عنهم....2

وحكايتهم النهاردة بعنوان..الغباء العبقرى!!!

فى اوقات الواحد بيسمع فيها اراء او تعليقات غبية جدا غباء يصل لدرجة العبقرية!!

واليكم بعض منهم.....

**مس الاباما التى صارت ملكة جمال امريكا عام 1995

سألوها:اذا ماستطاعت ان تعيش للابد فهل تقبل؟ولماذا؟

الاجابة: لن اعيش للابد لانه لايجدر بنا ان نعيش للابد..لانه لو عشنا للابد فلسوف نعيش للابد..ولكن ليس بوسعنا ان نعيش للابد لهذا لن نعيش للابد..

**********

**النجمة بروك شيلدز

التدخين يقتل..واذا انت قتلت فقد فقدت جزءا مهما فعلا من حياتك!

***********

**ونستون بنيت-لاعب كرة سلة

لم يسبق لى ان اجريت جراحة ركبة فى اى جزء اخر من جسدى!!

************

**مرشح انتخابات فى تكساس

هذا الوغد المنحط يستحق ان يركله جحش حتى الموت وانا الرجل القادر على القيام بهذا العمل... 

**************

**ال جور-نائب الرئيس كلينتون

*نحن نتأهب لحادث غير متوقع قد يحدث او لا يحدث

*ليس التلوث هوما يؤذى البيئة..بل مايفعل ذلك هو الشوائب فى الهواء والماء..

****************

**كولونيل جيرالد ولمان-مدرب فى الجيش

نحن لا نفرق بين الناس..فقط نحن نستبعد نوعا بذاته من البشر..

***************

**بيل كلينتون

لو لم ننجح فنحن نجازف بالفشل!!!

**************

**ادارة التموين-جرينفيل-ساوث كارولينا

سوف تتوقف كوبونات الطعام الخاصة بك بدءا من مارس 1992 لاننا تلفينا مذكرة تقول انك توفيت..ليرحمك الله يمكنك تقديم طلب ثانى فى حالة تغير ظروفك..

****************

**جورج. و. بوش

ده بقى عبقرى جدا قال 3 جمل خرااااااااااافة

1\ ان لدى ارائى الخاصة..اراء قوية.. لكنى لا اتفق معها دائما

2\"البيت الابيض ..ابيض "   دى بقى قالها لما سأله طالب بيرطانى عن رأيه فى البيت الابيض..

3\ لولا اختراع الكهرباء ..لجلسنا نشاهد التليفزيون فى ضوء الشموع !!!!

-----------------------------------
من احدى مقالات الدكتور احمد  خالد توفيق
-------------------------------

نكتفى بهذا القدر من العبقرية مع وعد منى بالبحث عن المزيد منهم....اهم يضحكوا الواحد فى وقت زنقة :D

                    

عنهم.......

هذا الجزء من ال عن...(عنهم) هيتناول قصصهم..وهم هيكونوا شخصيات قابلتهم فى الحقيقة او فى الروايات او فى الكتب حكم قصة تخصهم او تخص غيرهم..

قصة لفتت نظرى وقررت اسجلها ...وياريت تبقوا تقولولى اى لفت نظركم فيها..اذا ده حصل يعنى....

1_

هو طفل يبلغ من العمر 6 سنوات تقريبا لم تكن له هوايات فى هذا العالم سوى الوقوف امام فاترينات محلات الهدوم الرجالى..مش علشان يتفرج على الهدوم نفسها ..وان كان اكتر ما يلفت نظره فيها هى البدل ..وانما علشان يتفرج على الموديل اللى لابس البدلة!!

كان دايما بيختارهم لابسين بدل..لانها بتدى احترام اكتر وبيبقوا شبه الحد اللى بيدور عليه

كانت بقى متعته انه ينزل مع مامته وهى نازلة السوق ويحب يقف ويقارن بين الموديلات دى مين شكله احلى وياترى يكون اشقر ولا اسمر...ده شكله قاسى وده شكله طيب...كانت متعة مابيبوظهاش الا ان امه مابترضاش تطول امام المحلات دى وبتحب اكتر محلات الاطفال...

دور كتيرولكن مالقاش اللى بيدور عليه واهى جت الفرصة اللى بيتمناها...والدته اتأخرت النهاردة عن معاد الانصراف من المدرسة والبواب مشغول مع اهالى زمايله بيكلمهم باحترام وبيطمنهم على ولادهم..قرر انه ينتهز الفرصة ويروح يدور على ضالته..

مشى لحد ما قابل اول محل رجالى وفضل يبص بتركيز لكل الموديلات المعروضةويقارن لحد ما لقى اللى بيدور عليه..دخل المحل بخجل وسأل البياع عن سعر الموديل ده..الراجل ابتسم واستغرب وقاله طيب فين باباك يا جميل علشان يقيس البدلة..

رد عليه الطفل بابا مات وانا مش عاوزالبدلة بس ..انا عاوز الراجل اللى لابس البدلة والبدلة علشان يبقى (بابا)...... انا بس عاوز اعرف سعره من حضرتك علشان اقنع ماما تيجى تشتريه

بصله الرجل باستغراب وعطف وقاله يا حبيبى بس ده ماينفعش اب انت محتاج واحد زينا بيتكلم وبياكل وبيمشى ..انسان يعنى

خرج الطفل حزين من المحل بعد مافقد امله فى انه يبقى عنده اب يحترمه البواب ويقف معاه كتير لما يجى ياخده اخر اليوم..اب يتباهى بيه وسط اصحابه اللى كلهم عندهم ابهات وهو لا..هو بس اللى عنده صورة لابوه متعلقة على الحيطة فى الصالون..اب مات فى الحرب زى ماقالتله امه..صورة مابتعملوش اى حاجةمن اللى نفسه فيها

مشى الطفل حزين وهو باصص فى الارض لحد ماخبط فى رجل واحد ماشى ..بصله وقاله معلش يا حبيبى..وكانه نجده نزلت من السما..بس هو ده..

راجل وفى ايده جرناله ومش معاه ست ولا طفل جميل جدا ..هو ده

مشى الراجل ومشى الطفل وراه ..دخل الراجل كافيه والطفل فضل وراه يبصله من برا لحد ما الراجل اخد باله منه وبصله بدهشة وندهله يدخل ...

قاله انت جيت هنا ازاى مش انت اللىخبطت فيك؟!

قاله اه اصلى مشيت وراك..

طب عاوز ايه اجيبلك اكل ولا فلوس؟

قاله لا مش عاوز  ..قاله انت صغير اوى انت مش عارف ترجع بيتكم ولا ايه

 هزالولد راسه ..قرا الراجل اسمه المدرسة على قميص الولد وقاله تعالى انا هوصلك.. فى الطريق سأله الطفل..

 هو انت عندك ست وطفل؟

ضحك الرجل وقاله قصدك زوجة يعنى لا ياسيدى ماعنديش انا مش متجوز..

 ابتسم الطفل  ببراءة وقاله طيب مش عاوز ست وطفل؟اندهش الرجل وسأله عن سبب سؤاله ده

حكى له الطفل القصةمن اولها فلمعت عيناالرجل بالتأثر ..وسكت شوية وبعدين قاله ندور على مامتك الاول اللى قلقانه عليك دلوقتى وبعدين نشوف الموضوع ده

فرح الطفل واعتبر دى موافقة ومشى معاه لحد ما وصلوا المدرسة

واول ما شافته امه فضلت تحضن فيه وتحمد ربنا ولما هديت اخدت بالها من الرجل اللى معاه ..شكرته انه رجلعها ابنها قبل مايستأذنها انه يمشى ..

نداله الطفل وقاله رايح فين انت وعدتى تفضل..

قاله روح دلوقتى وانا هبقى ازوكم فىالبيت ..وانصرف

سألته امه عن قصد الراجل ايه فقالها عن الاتفاق..

احتضنت ابنها فى حزن وقالته طالما قالك جاى فهيجى..

ونزلت كلمة النهاية على ظهر الطفل الحالم وامه الحزينة

دى كانت قصة فيلم تناولتها السينماالروسية من اكتر من25 سنة ونزلهاالاستاذ عبد الوهاب مطاوع فى كتابه(افتح قلبك)

 

 

 

 

مع نفسى 11

لما هند صبرى قالتفى اخر حلقة فى فريتيجو انها كانت فاكرة ان الواحد بيرتاح لما بيبقى لوحده واكتشفت ان ده غلط واننا بنرتاح فى الزحمة..الكلمة دى علقت معايا جدا وامبارح اثبتلى انها صح لابعد الحدود

فى الزحمة ممكن تصرخ وممكن تضحك بصوت عالى وممكن تزغرط لو حابب

ممكن كمان عينك تدمع من الضحك بقى من التأثر ولا حد هياخد باله..

فى الزحمة واللمة انا كمان باخد راحتى

**************

ديما لما بتعلق بحد   باى درجة من الدرجات سواء كانت صداقة او انتمة او خلافه...

مابيكونش قرار البعد قرارى..ديما بفضل ماسكة فى طرف الشعرة لحد ماللى قدامى يقطعها هو..عارفة انهاحاجة حلوة وجميلة ..بس مؤلمة

مش عارفة تفتكروا هبقى شريرة لو تمنيت انىانا اللى افارق؟! 

*******************

ببقى حلوة اوى وخفيفة وكأنى طايرة من على الارض لما بعيش لحظة لسعان

 وانا للاسف من زمان مالسعتش

ياااااااارب ارزقنى لحظة كده

********************

عندى نوع من الذكريات لما بتيجى فى دماغى ببتسم وادمع فى نفس ذات الوقت!!

********************

لما قريت مقال النقط لعبد الوهاب مطاوع اكتشفت انى انا كمان بستخدم النقط كتير وانا بكتب ..

حاولت اتعامل مع الموضوع بحرفية زى ما نصحه رئيس تحريره وقتهاولكن ماعرفتش

ايون....انا بحب النقط :)

*******************

عن....الزن

اولا وقبل ماندخل فى موضوعنا احب اعيد على كل المدونين والمدونات اصحابى الاعزاء

كل سنة عيد وانتم بالف خيروسعادة يارب وبدعى ربنا انه يتقبل مننا كلنا سائر اعمالنا فى الشهر الكريم

وبعتذر كعادتى المزمنة عن اى تقصير بس يوم رمضان كان يدوبك ينى

ووحشتونى جدا

******************

ندخل بقى فى موضوعنا

لما حد يتصل بحد 8 او 9 مرات ومايردش..تفتكروا ايه الاحتمالات القائمة؟

يااما الحد ده نايم_____المفروض مانصحهوش

يا اما مشغول_____المفروض مانخوتوش

ياما مش عاوز يرد____يبقى مش هيرد

يبقى ليه الزن؟؟لما هى الاجابة واحدة من التلاته يبقى ليه نتصل ورا بعض ورا بعض عشرومية مرة...ليه الزن ده

المشكلة انهاكتير بتيجىمنناس قريبين للواحد وبتنتهى بمشكلة لانها فى الغالب بتتفسر علىانها تناكة او تنفيض..او اى حاجة مش كويسة!!

احقاقا للحق الحركة دى بتتعمل من الستات والبنات كتيييييييير ..بس ده مايمنعش ان الرجالة استاذه برده فى الزن

كتير من المشاكل اللى بسمعها بتبقى بسبب ده

مع انى شيفاها بسيطة..لما مايردش على التليفون بعد مرتين بسيطة..هيشوف اتصالك واكيد هيتصل..

لو ماكلمكيش عاتبيه..ولو برده

ماكلمكيش مش الحل انك تكونى زنانة وتطلعى فرستك على زراير الموبايل!!

وانت يا اخى..طالما مش عاوزة ترد عليك دلوقتى سيبها ماتطبقش على نفسها!!

دى الحكاية وصلت للكماين.!! اه والله تكلمه من موبايلها ولو ماردش تكلمه من الكشك او من نمرة قريبتها او صحبتها!!..لدرجة ان فيه ناس بقت بتخاف ترد علىالتليفون اصلا

وفى ناس بتسجل كل ارقام القرايب والاصحاب علشان لو جربت اى موبايل يبقى واخد احتياطاته!!

ومش بس بالتليفونات ..ده حتى لو عاوزة حاجة هومش عاوزها خروجة بقى ولامناقشة ولا اى حاجة تلاقى الودان اتمسكت والزن اشتغل وعيش حياتك..

قبل العيد كنا فى مشوار انا وواحد صاحبتى لمصلحة الضرايب واتفقنا مع صحبتناالتالته تستنانا لما نخلص..دخلنا المكان وعملت الموبايل سايلنت..

بكلم الموظف طلب منى اوراق..بلمهاله من الشنطة لقيت الموبايل عمال ينور..وكان فيه اتنين ميسد من صحبتنا

بعد ربع ساعه على ما خلصنا بجيب الموبايل لقيت عليه 94 ميسد من نفس صحبتنا

وانا بشوفهم رنت تانى فتحت وبنرفزة ..ايه يابنتى في ايه؟!!

وبكل براءة..خلصتم ولا لسه؟!!!!!!!

ياسلااااااااام..طب والمصحف مانا راده

 

عن..الاشياء والوقت

عندما كنت صغيرة كنت ارى الاشياء بنظرة مختلفة عن الان..
كنت ارى الوردةشئ جميل زاهى الالوان احاول دائما محاكاته عن طريق دفتر رسوماتى والوانى..اما الان فالوضع اختلف كثيرا..هى نفس الوردات ونفس العيون التى تراها ولكن المعنى اختلف..فهى لم تعد تمثل سوى ذكرى..حنين لايام واشخاص لن يعودوا..

عندما كنت صغيرة كنت ارى البحر بشكل مختلف..البحر عندى كان الصيف واللعب وطعم المياه المالحة ومحاولاتى لبناء بيوت على الرمال..اما الان فالبحر اختلف..
او بمعنى ادق نظرتى له اختلفت كثيرا..اصبح مكان مثقل من كثرة الهموم التى احمله بها ومن كثرة الاسرار التى اشاركه فيها..احيانا اشعر بخوف منه اخاف ان يصيبه الملل من اسرارى ومن حكاياتى التى احاول ان اغرقها به..اخاف ان يلقى بها مرة اخرى على الشاطئ فتعود الى..او فى احسن الظروف يراها الناس..

حتى رماله لم تعد تحتمل بناءبيوت عليها..اصبحت هشه لا تتحمل سوى الاحرف الاولى من اى شئ يدور فى خاطرى سرعان ماتأتى اول موجة وتأخذها معها!!

حقا هى نفس الاشياء..ولكن الوقت له مفعول سئ عليها...

ياترى الصورة الجاية ايه؟!!!!!