كل عيد وانتم بخير يارب

كل سنة وانتم طيبيييييين 

وحشتونى جدا جدا ووحشنى كلامكم وتعليقاتى عليكم واسفه انى ما قدراتش اتابع العشر ايام الاخيرة من رمضان بس ماعرفتش خالص اوفق وكان لازم احاول اجتهد فيهم على اد ما اقدر

ربنا يتقبل منا جميعا يارب صيامنا وقيامنا ويجعلنا من المغفور ليهم والمعفى عنهم فى رمضان ده

وعيد سعيد عليكم يارب وينعاد عليكم وعلينا وعلى كل اللى نحبهم بالخير يارب

تخاريف 2

*مؤخرا اصبحت لا اسمح لاحد بدخول عالمى ويقترب منى بسهولة....ليس تكبر او غرور كما يتهمنى البعض........انه محافظة على قلبى من الجرح ليس اكثر

*اسوء شخص فى الدنيا هو اللى يحسسك ان حبك ليه كان غلطتك انت......


*نقطة ومن اول السطر..............

*هو الحب فعلا بيعمل المعجزات؟؟

*مؤخرا يراودنى سؤال عجيب..هو انا بشتغل علشان اعيش ولا بعيش علشان اشتغل؟؟

*عذرا ايها الحب اعلم انى احملك كل ذنوب البشر.....سامحنى فانا مجرد بشر

*عذرا  سيدى فكرامتى مثل الدواء اضعها دائما بعيدا عن متناول الاطفال.......

*بنفرح احنا اوى معشر البنات بمن يقول لنا خدى بالك من نفسك....بس لو حطينا رومنسيتنا دى على جنب هنحس انه لو قال هاخد بالى منك هتبقى احلى بكتير

*بتعجبنى اوى فكرة الاستغباء....كم جميلا ان تكون غبيا وقت اللزوم

*اعدك بانى ساستمر بالتزام الصمت.........

*الكتمان صعب حقيقى..ولكنه الحل الوحيد لما مانلاقيش اللى نبوح له...........

*من قال ان الذى يحب لا يكره كان اولى به ان يقول ان الذى يحب لا يجرح........

*كم هى مؤلمة تلك الاسئلة التى ليس لها اجابات...ارجوكم كفوا عن ايلامى

*ان الاطفال اطهر من فى الكون.....فعذرا لن اصدق سواهم

*دائما احاول ان اعرف حدودى حتى لا اتعداها........

*كان هذا اختيارك فلماذا تلومنى على ردود افعالى؟؟

ااااه يامرارتى

خلاااااااص انا قربت اجيب اخرى رمضان ده مش عارفة الواحد يلاقيها منين ولا منين

من الناس العجيبة اللى الواحد بيتعامل معاهم فى الشغل ولا من افلام الرعب اللى بقيت بعيشها مؤخرا

ولا من التليفزيون وسنيييه.....

وبمناسبة التليفزيون  ..بالنوسبة للسيد المحترم اللى عمل اعلان استرجل واشرب بريل  الستات اتغيروا بعد الثورة واسترجلوا..............نعم؟يعنى ايه؟ مش فاهمة وجهة نظر جنابك انا

ثم ايه بلادى بلادى بلادى.....هععععععععع دى؟


بالنوسبة للاخ المحترم اللى حاطط مسابقة الاسئلة الدينية  ماهو اسم السورة اللى فيها الاية دى"قل هو الله احد الله الصمد"؟.............لا وكمان مدى  خيارات 1\الاخلاص 2\الناس 3\الفلق
هااااااااااااااااااا عرفتوها ولا ابسطهالكم؟


بالنوسبة بقى للاخ المحترم جدااااااااا اللى عامل اعلان قطونيل.........نعم........بوكسرات وفنلات ايه اللى زى الاصحاب؟ثم انت عاوز شباب مصر يمشوا مسقطين البناطيل علشان تبان ماركة البوكسر
يعنى هى ناقصااااااااااااااااااااااكم


وغيره وغيره وكله كوووم بقى والمحترم اللى عامل اعلان شيبى جديد كده اسمه ترو شيبسى
يعنى ايه"الحق مايزعلش حق"؟ها يعنى ايه؟
ثم بزمتك يا اخى جايب بت حلوة وكاتب فيها شعر حلمنتيشى تقولها ما اطول منخارك؟
ثم يعنى ايييييييييييييييييييييييييييه "زقلطينى"  .........حد يفهمنى معنى الكلمة دى اييييييييه؟؟!!


وبعدين ايه هوجة الشيبسى اللى مكتسحة التليفزيون والبلد كلها دى؟كل رمضان يطلعلى كام منتج جديد  ياشيبسى ياسمنة يا زيت........اى بقى!! مش هنصنع غير كده ولا ايه ؟هنبقى ملوك العالم فى الشبيسى؟


وبمناسبة الصناعة.....الاخ المبجل المحترم اللى عامل اعلان منتجات "فريش"  ..سياتك بتصدر منتجاتك لاكتر من 35 دولة؟طب مش حرام الكدب فى رمضان؟ يا مؤمن ده احنا جيبنا 3 مراوح فريش بتاعتك دى فى يوم واحد والتلاته باظوا فى يوم واحد وبنفس العيب زى مايكون انتم محفظينهم يعملوا العملة السودة دى.......ماهو حاجة من الاتنين يا انتم كدابين كدب الابل يا اما بتعملوا للمواطن منتج غير منتج التصدير....يا اما وياخوفى من يا اما دى انتم بوظتوا الصناعه فى 35 دولة
ربنا يستر
اااااااااه يا مراتى المفقوعه يانى..........

المجنون والنضارة

من يومين كنت رايحة المنصورة وكنا تقريبا الساعه 11 قبل الظهر, ساعة ما ركبت الميكروباص

العربية ماخدتش وقت علشان تحمل كانت صغيرة وكان اخر راكب فيها راجل عجيب كده مارتحتلوش من اول ما شوفته ماعرفش ليه  حتى لومت نفسى وقتها اصل الراجل كان بيعرج برجله بسبب اعاقة 

ممكن اكون مارتحتلوش بسبب ده؟استغفر الله العظيم.....مش عارفة بقى اهو مجرد احساس

كل ده دار فى دماغى فى ثوانى وخلاص نسيت الحكايه  وجت فى دماغى مليون حكاية تانية

اتحركت العربية...وشيلت نظارة الشمس من على عنيا ورفعتها على الطرحة من فوق كده وغمضت عنيا  منتظرة المسافة تعدى ونوصل............

فجأة لقيت الراجل اياه بيتكلم وبيقول بصوت عاااالى سامعه كل  اللى فى العربية"شيل نظارة الشمس دى ياعم واجعة عنيا"
فتحت عنيا كده وضربت عينى فى اللى جنبى واللى قدامى .......انا متاكده ان ماحدش لابس نضارة غيرى!!!!!!!

هو الراجل ده بيكلمنى ولا ايه؟طيب وماله ومال نضارة الشمس وماله ومالى اصلا ؟؟؟؟؟؟؟
طنشت خالص ولا كانى سمعت وخصوصا ماحدش من اللى حواليا اظهر ادنى ادنى تاثير

جايز تهيأت؟
شوية والراجل كرر نفس الكلام بس بطريقة اوقح ولا حد بينطق......وبدأ يحكى حدوتة ويتكلم مع الناس اللى برا العربيه ولا حد بينطق......ويرجع تانى يوجه كلامه للعم اللى لابس النضارة"انا"

وبعدييييييييين بقى؟طيب اشيل النضارة؟لا طبعا كده الكلام موجهلى رسمى؟ارد عليه ؟لا طبعا عيب اذا كان الرجالة اللى بشنبات ساكتين هتلكك انا واتكلم؟
يكونش العربية كلها تبعه وانا اتخطفت؟وارد ماهو مافيش امان؟بس احنا فى عز الضهر وانا راكبة من الموقف؟ثم ان الناس دى ماحدش بيبص فيها للتانى .اكيد مايعرفوش بعض...

ملخص الحكاية انا اترعبت جدا........

شوية ولقيت الراجل بيقول للسواق هدى على جنب عاوز اجيب حاجة من الكشك اللى على جنب

......بما انه راكب فى اخر كرسى فالسواق تطوع وقاله عاوز ايه انا هنزل اجيبلك بدل ماتنزل الناس   .....راح قاله عاوز سيجارتين فك وكبريت لساعه الفطار....ياسلاااااااااااااام

بصيت للى حواليا على اساس يظهر اى تعبير عليهم ولا الهوا..تماثيييييييييييل

السواق نزل وجابله الحاجة والراجل مستمر وبيكلم اللى لابس نضارة"انا"

اداله السجاير وكمل سواقة ومرةواحدة شمينا ريحة دخان ......ايون الراجل ولع السجارة!!!!

وقتها بس كل اللى فى العربية بدأو يبصوله ووقتها بس السواق اتكلم وقاله ياعم انزل من العربية احنا صاييمين.......

وبدأ الراجل يشتم .....وتحرك كل الركاب لمناصرة السائق وطرد هذا الرجل العجيب من العربية فى قارعه الطريق
ووقتها بس عرفت انهم مش معاه!!!!

خرج الراجل وبدا الناس تتكلم ويقولوا راجل مجنون او بيدروش علشان ينزل ومايدفعش الاجرة

وساعتها ماقدرش اتحمل واسكت.....هو انتم يا جماعه اول مرة تاخدوا بالكم انه مش طبيعى؟

ده كان ناقص يحلفلكوا انه مجنووووووووووووون

على رائ الاستاذ ابراهيم...بلد مجانين صحيح

اريده سائق ماهر............

سألنى احد الاصدقاء مؤخرا اسئلة من النوع الرخم التى لايمل الناس من سؤلها
 ورغم انى مؤخرا ملتزمة الصمت تجاه ذلك النوع من الاسئلة و لانه صديق عزيز ولانه قد يفسر صمتى خطأ ولانه انا اصلا مخنوقة وعاوزة ارغى ولانه لحوح جدا ومش هيسبنى الا لما اجاوبه فلقد دار الحوار الاتى
 هو:ايه يا نور العمر بيعدى والفرص بتقل مش ناوية تتنيلى بقى وتفرحينا؟!


انا:اتنيل؟الله يكرمك والله النية موجودة يعنى بس تقريبا هم اللى خلصوا او ماتوا فى التحرير الله اعلم
   وعموما طالما انت متنحرر كده ماتتصرف يعنى ايدى على كتفك ولاهى طولة لسان فى الفاضى؟
هو:طيب يعنى انتى شروطك فيه ايه عاوزاه مثقف واخلاق ووضع مادى محترم وكده؟


انا:والله مايضرش كلها حاجات جميلة ومنطقيه مع انى مش شايفاها كافيه يعنى؟ ماهو طبيعى يبقى حد مثقف  واخلاق دى لا خلاف عليها ووضع مادى يعنى مابتبهرنيش الحاجات دى بس يا حبذا

هو:يا حبذا؟! طيب خلاص انا فهمتك انتى عاوزة حب بقى وحاجات رومانسية وكده صح؟

انا:هو برده مايضرش يعنى الحب بيدى طراوة كده للحياة رغم انى بردو شيفاه مش كافى او ماعدش كافى فى زمنا ده ثم ان الحب حالة او فكرة ليها عمر وتاريخ صلاحية ممكن تخلص بعد اسبوع او شهر او سنة وعلشان كده هو مش شرط بس وجوده اكيد مرحب بيه وياحبذا.......

هو:امال ايه بقى انتى عاوزة ايه؟
انا:ببساطة انا عاوزة اللى هسمحله يتولى مقعد القيادة فى حياتى يكون سائق ماهر جدا ماهر لدرجة انى ممكن عينى تغفل وانا جنبه وعارفة انه مش هيدخل بينا فى حيطة........
سائق ماهر يعرف يتعامل مع مطبات الحياه بهدوء ..يعرف امتى يسرع وامتى يهدى وامتى يقف وازاى يحترم الاشارات
هو:انتى محسسانى انى قاعد فى المرور

انا:انا شايفاها كده شايفة ان الحياة الزوجية زى رحلة بالعربية بعض البنات بيجدوا نفسهم خارجين منهابحادثة بشعه,وبعض الرجال مش بتخلى عيونهم تغمض ولو لحظة متوقعين لاسوء فى اى وقت
 واسوء الرجال بقى اللى بيخلى مراته هى اللى تتولى القيادة ويفضل هو قاعد جنبها يزعق وخلاص
هو:طب يا فيلسوفة ومافيش اسوء النساء يعنى ولا ايه؟
انا:لا طبعا فيه اسوأهن اللى تكتفى بالنوم وخلاص لازم الست تبقى متأهبة لو شريكها فى رحلة عمرها تعب تتولى هى مكانه لحد ما يقف على رجله تانى ........انا شايفه ان ده دورها

هو:بس خدى بالك فى ست بطبعها قيادية
انا:صدقنى حتى دى بينهاوبين نفسها بتحتاج لراجل هو يتولى القيادة دى طبيعة المرأة وصدقنى عند النساء عموما الرجل الاقدر على توفير الامن هو الاعظم والاكثر جاذبية.......
  ها بقى عندك عريس ولا نكتفى بهذا القدر لحين اشعار اخر؟
                  ولم اتلقى الرد واهو كله كلام واهى كلها احلام.......ونرجع تانى لصمتنا ...