الخميس، 7 يوليو 2011

صندوقى






تم تمرير الواجب التدوينى ده من الاستاذ ابراهيم(سالزياد)ومن خالد(سواح فى ملك الله)
وبشكرهم بصراحة لانى ماكنتش عارفة ابدأ تدوين تانى بعد شهر التدوين..

الغريب بقى فى الصندوق ده انه بيحدد ان الذكرى تكون مبهجة وانا اه كل حياتى ذكريات بس عمرى ما حاولت اعرف ان كانت مفرحة ولا حزينة اهى ذكريات وخلاص
 فالموضوع تطلب منى تفكير......عميق

                                           الصندوق

المشهد الاول:ظهور نتيجة الثانوية العامة فرحة من القلب بجد اخيرا تعب سنتين ثانوى وشدة اعصاب تم تكليله بنجاح ومش اى نجاح يعنى ده نجاح مبهررررر

مجموعى كان100%هههه اه وربنا ده بعد طبعا المستوى الرفيع والذى منه ورغم انى ماكنتش الاولى لان كان فيه اتنين جايبين فوق كده وماتسألونيش ازاى!!!!!!!

بس انا فضل مجموعى غير......مجموع كده له شنة ورنة........

المشهد التانى:وكأى فرحة فى حياتى يجب ان يتبعها وسريعا جدااااا حاجة تغير المود ماتفهمش ليه

جه معاد كتابه الرغبات وكنت انا طبعا راسمة طول السنتين على صيدلة حباها وحساة انى هدخلها  باذن الله......

المجموع زغلل عين ماما وبابا وقتها طيب يابنتى ماتدخلى طب !

طب ايه يا جمعة انا مش بحبه انا عاوزة صيدلة 

يابنتى خسارة .....

يا جماعه انا ماينفعش ابقى طبيبه خالص .....

ليه بقى ان شاء الله؟.........لانى مابعرفش اخمن!!(من صغرى وانا مش مقتنعه ان فى حد يحط سماعه ويسمع على ظهرك ويعرف عندك ايه......مع احترامى لكل الاطباء طبعا)

طبعا الكلام ماقنعش امى وانا يا جماعه مابعرفش ازعل ماما يعنى كفايه بس احس فى عنيها ولا نبرة صوتها انها زعلانة حتى بدون توجيه كلام عندى استعداد الغى كل حاجة علشان خاطرها

المهم سكت وقلتلهم اللى تشوفوه بقى......واخدت جنب وسكت كعادتى

بابا حبيبى كعادته حس بيا ......زقالى طيب بصى انا هعمل ورقتين ونختار بينهم ونشوف هيطلعلك ايه(طبعا من باب التهريج وانى يخلينى ابتسم يعنى)

وقد كان عملناها وطلعت اول مرة صيدلة.....كررناها...10 مرات.....فى كل مرة صيدلة

ماما لفت نظرها الموضوع وقالتلنا لا انتم بتخمو هاتوا انا اعملها.....

وعملتها باديها........بردو صيدلة......وصل العدد الاجمالى للمحاولات 30مرة

فى كل مرة صيدلة..............نصيب بقى:)--------وقد كان


                                         اهداء
                                    *******
الى روح ابى رحمه الله....ديما كل حاجة حلوة فى حياتى يا بابا ليك نصيب فيها
             ربنا يجمعنى معاك فى الجنة ان شاء الله


                                        عتاب
                                    *******

هعاتب نفسى اولا لانها بتغلط غلطات غبية الصراحة  وديما بتصدق اللى حواليها وده غلط,وهعاتب كل من وثقت به وخان الثقة دى.....ليه كده يعنى؟

                                       كلمة
                                    *******

بقلها لنفسى وليكم........تفاؤلوا خير فمع كل نهاية لابد من بداية جديدة الى ان تقوم الساعة

                               تمت بحمد الله
                           *******************


نحول الصندوق بقى لخمسة من الاصدقاء 

1\موناليزا صاحبة مدونة امة الله

2\بنت من الزمن ده

3\مصطفى صاحب مدونة باش كاتب

4\عباس ابن فرناس صاحب مدونة مات الكلام

5\دعاء العطار صاحبة مدونة كلمتى

هناك 30 تعليقًا:

سواح في ملك اللــــــــــــــــــه- يقول...

الحمد لله اني لحقتك قبل مخرج علي الشغل

ههههههههه

كنتم عائة جميلة رحم الله والدك

احيي فيكي مراجعة نفسك


متزعليش من حد انشاء الله ربنا هيعوضك خير


تحيتي لاطيب نور

reemaas يقول...

:)

حظى انك لحقتنى يا خالد
الحمد لله على كل قضاءه ....فيه خير حتى لو ماكنش واضح دلوقتى

مش زعل والله يا خالد هو مجرد سؤال ليه بيعملوا كده انا مش فاهمة

ربنا يهدى

مصطفى سيف الدين يقول...

والله عندي احساس ان الورقتين كان مكتوب فيهم صيدلة ههههههه
حلوة ذكريات مكتب التنسيق والرغبات والتفكير
تحسي ان الفترة دي هي اكتر فترة تشعري فيها باهمية عقلك وانه بيختار مستقبلك بالتحديد
ربنا يرحم والدك ويغفرله ويبارك فيكي وفي اسرتك
تحياتي ليكي

reemaas يقول...

مصطفى سيف

هههههههههه
ماما جالها نفس الاحساس يادرش علشان كده عملتهم بنفسها

اه تقريبا دى كانت اخر مره اختار فيها

يارب اللهم امين

ابراهيم رزق يقول...

اولا انا كنت هاقول ان الورقتين مكتوب فيهم صيدلة بس مصطفى سبق
رحم الله والدك و ادخله فسيح جناته
الحمد لله انك دارستى حاجة بتحبيها

اما البشر و الناس فتلك طبيعتهم من ايام ادم و حواء و قابيل و هابيل

تحياتى لصنوقك الذى اشعر انك لم تفتحيه بعد

reemaas يقول...

ابراهيم رزق

يعنى كان عندها حق ماما بقى تشك فينا هههههههه

اللهم امين

جايز بس حسة يا استاذ ابراهيم ان ده اخره ماعرفش ليه

Bent Men ElZman Da !! يقول...

ده صيدله مكتوبالك يابنتى مهما حاولتى
الحمدالله انك حققتى اللى كنتى عايزاه :)
بس انا مش فاهمه حكايه 100% دى
انا عارفه انها كانت بتحصل ايام التحسين
ان اللى مش عاجبه مجموعه ممكن يعيد السنه عشان يحسن المجموع
ربنا يرحم والدك وتتقابلوا فى الجنه ان شاء الله :))
ميرسى ليكى اوى يا بنوته انى مررتيلى الواجب ده

faroukfahmy يقول...

مش عارف ليه يانور بيعجبنى قوى سردك للحكايات بحس بصراحة انى امام كاتب كبير زى توفيق الحكيم وكانت عنده كاريزما غريبه لجذب الناس وانتى وهوه بتفكرونى بحكايات ستو العجوزة خاصة حكايات قبل النوم
تعرفى يا نور انا لاانام الاو فى حضنى احد كتب توفيق الحكيم واذنى مع انغام عبد الوهاب رحم الله الاثنين واعطاك طول العمر

الاحلام يقول...

من الواضح انكى طيبة القلب ورقيقه المشاعر واختيار الطب يريد شخصيه عكس هذا فصيدليه احسن بكل المقاييس
تمنياتى لكى بالنجاح الدائم وبالسعاده الدائمه تقبلى تحياتى الاحـــــــلام

Unknown يقول...

نور وحشتيني :)
الذكريات دائما بتبقى حلوه عشان بتفكرنا بنفسنا زمان و عشان بنشوف معاها حاجات مكناش شايفنها أيامها, أسرتك جميله أوي ربنا يحفظلك مامتك و يرحم بابكي اللي أكيد خلاكي تبقي إنسانه جميله و صادقه زي ما انت.
صندوق مختلف فكرني بذكريات التنسيق و وجع القلب و الدماغ ده.
ربنا يسعد قلبك يا بنوته

تحياتي و كل الود لكي

غير معرف يقول...

مساء الغاردينيا نور
ههههههههه بجد ضحكت من قلبي على موقفك وانتي عماله تبصي في ماما وبابا وورقة مستقبلك بين ايديهم اممم انتي متأكدة انه الورقتين ماكنتش صيدله <<< كلنا شاكين فيكي هههههههههه
ربنا يوفقك ورحم الله والدك ووالدي وأسكنهما فسيح جناته ولاحرمكِ أحضان والدتك "
؛؛
؛
لروحك عبق الغاردينيا
كانت هنا
reemaas

آخر العنقــــــود يقول...

رحم الله والدك رحمة واسعة ويجمعك بكل من تحبين في الفردوس الاعلى

حلو اوى طريقة كتابتك للمشهدين.. فعلا ربنا مابيخترش غير الخير لبعاده.. الحمد لله :)

دمت بسعادة

دعاء العطار يقول...

ههههههههههههههههههه

ربنا سترها معاكى يانور (:

بس اوعى تكونى كنتى بتخمى

ربنا يخليلك مامتك ويرحم باباكى ويجعله من أهل الجنه يارب

انتى وحشتينى أوى ع فكره .. راجعه عن قريب وميرسى ع الصندوق (: (:

karem elmasry يقول...

اوقات كتير الواحد بيفتكر ذكرياته ويقعد يدحك عليها حتي ولو كانت حزينه ويقعد يتأملها ولو انه لسه عايش فيها

حلو قوي الصندوق دا يا ريمو ويا رب دايما تحققي كل الي بتحلمي بيه

وربنا يرحم ولدك يا رب ويكون مسواه الجنه ان شاء الله

reemaas يقول...

Bent Men ElZaman Da !!

ايتها خدمة يا بنوتة
اااااااااه قدرى بقى ياستى
هبقى افهم الحكايه دى بينى وبينك

reemaas يقول...

faroukfahmy58

تشبيه انا مش اد خاااااااااااالص يا استاذ فاروق

جايز علشان انا بحب احكى حواديت؟
:)

reemaas يقول...

الاحلام

ميرسى ربنا يخليييك

reemaas يقول...

شيرين سامي

انتى كمان وحشانى كتيييييييييييييييير يا شيرى

reemaas يقول...

ريــــمــــاس

هههههههههههه
بالظبط يا ريماس ده اللىكان حاصل
كان منظرى تحفة

reemaas يقول...

آخر العنقــــــود

ونعم بالله كانت اياااااام

reemaas يقول...

دعاء العطار

انا اخم انا
لاممكن ابدا
هههههههههههههههه
والله وانتى يا دعاء
منتظرة صندوقك

reemaas يقول...

karem elmasry

اللهم امين
تسلللللللم يا كيمو
بفرح لما بشوفك هنا

عباس ابن فرناس يقول...

واكيد طبعا انتى مش ندمانة على اختيارك للصيدلة مش الطب
وجميل ان يكون الاهل متفقين معانه فى الرغبات او على الاقل يحترموها
بتوفيق دايما يادكتوره ومن نجاح لنجاح

وبالمناسبة انا كسلان جدا اليومين دول
بس لازم اعمل الواجب اللى كلفتينى بيه
تحياتى المستعطرة

الاحلام يقول...

دائما اتمنى عمالقه التدوين يلتقون بمدونتى المتواضعه فاعتز بتعليقاتهم وارائهم يوجد بعض العمالقه يحرومونى من هذا الشرف انتى عملاقه منهم فاتمنى التنازل بعض الشىء حتى نسعد بكلماتك هناك دمتى بخير الاحــــــــــلام

reemaas يقول...

عباس ابن فرناس
ايون طبعا يلا بطل كسسسسسسسسسسل

reemaas يقول...

الاحلام

ياخبر
حقك عليا
انا لا عملاقةولا حاجة وفعلا دى غلطة منى والله

FAW يقول...

غريبة قوي حكاية الورقة دي . . بس كل شئ نصيب فعلا

100 % ؟؟ . . اللهم لا حسد :))

متشكرين يا ستي علي الواجب التدويني

يا مسهل :)

reemaas يقول...

FAW

انت بالذات يا مصطفى بعد مافتحت صندوقك عارفه احساسك هههههههههههههههههههههههه

لا شكر على واجب ياسيدى

هينو يقول...

أولا يا ريمو رحم الله والدك وأسكنه فسيح جناته وأكرمه بكرمه وفضله

اللهم آآآآآآآآآآآمين


نيجي بقى للصندوق فكرته لذيذة خالص
go on

reemaas يقول...

هينو


اللهم امين
هى الحكايه كانت دايرة على كل المدونات يا هينو