الاثنين، 18 أبريل 2011

تاج الثورة

مسا الوردات على عيونكم النهاردة عندى تاج من الجميلة شرين  نبتدى........

السؤال الأول: * هل توقعت ثورة 25 يناير؟


     لا طبعا ماتوقعتهاش يعنى اخر توقعاتى كانت مظاهرات علشان تغيير حكومة نظيف ليس اكثر علشان كات افورت الصراحة

وهل كنت من ثوار ميدان ( التحرير - الكنبة - الكمبيوتر - حدد الميدان الآخر الخاص بك)؟

  لا الصراحة اناماكنتش من ثوار حاجة بالعكس انا كنت من المتخوفين جدا من الثورة ومن المقتنعين ان اكيد فى ناس هيخربوا فيها وكنت متوقعه احداث 28 يناير لابعد حدودها بغض النظر عن انها كانت مؤامرة وكده ده انا ماتوقعتوش بس توقعت ان العشوئيات هتهجم كنت خايفة جدا الصراحة على البلد

* ما لم تنجح الثورة في تحقيقه هو:

ان يكون فى ثقة بين الناس وبعضها لانها انعدمت فى الفترة الاخيرة,انها تتحكم فى غلاء الاسعار البشع اللى موجود,انها تنزع روح التشفى وتزرع روح البناء بقى ده لحد دلوقتى لسه ماتحققش

* أكثر شىء فرحك في هذه الثورة هو:

ان الخوف من اللى فوق قل رغم ان ده زى ماله مزايا له عيوب برده,وان الشباب احباطه وانكساره انتهى ماعدش فى حد كبير بيقول لحد صغير انت عيل مالكش لازمة فى الدنيا, وقبل كل ده ان مصر بقت من  تانى مركز اهتمام العالم ده غير اننا كمصريين عرفنا اهمية امننا واستقررنا للعالم قبل مايكون مهم لينا

* الشخصية التي أعجبتك خلال الثورة:

بينى وبينكم كده ماحدش اصل الكل ماكنش مستوعب والاراء كلها كانت وليدة اللحظة ماحدش يعنى رائيه او موقفه لفت نظرى

 * الشخصية التي احتقرتها بسبب الثورة:

كل اللى كانوا بيهللوا قبل التنحى وبعد التنحى شتموا ولعنوا واولهم مصطفى بكرى

* أطرف ما سمعته خلال الثورة؟

اكييييييييد النكت اللى كانت بتارخ كل لحظة من لحظات الثورة انتم عارفين اننا لو جمعنا النكت دى هنحصل على احداث الثورة بالترتيب؟

* القناة التي تابعت من خلالها أحداث الثورة هي:

العربية ودريم2

* الجريدة التي كنت تقرأها لتتابع الثورة:

لا ماكنتش بتابع اخبار الكل كان بيكدب سواء قومى او حزبى كله كان مش امين فى اراءه واخباره

* الكاتب المفضل خلال الثورة:

بامانة انتم .
كنت بتابع المدونات اكتر من الكتاب ماعرفش لى ماكنت مصدقاهم

* المذيع (المذيعة) المفضل خلال الثورة هو:

للاسف الشديد لايوجد


* كلمة تقولها لشهداء وجرحى 25 يناير:

انتم اللى عملتوا الثورة,قبلكم كانت مجرد احتجاجات وبعدكم بقت غضب وتكلمت الاغلبية الصامتة نحتسبكم عند الله شهداء

* متقولش إيه إدتنا مصر وقول حندي إيه لمصر.. عندك حاجة تديها لمصر؟ 

اول مرة تتقال الجملة دى من غير رنة التريقة اللى كانت بتتقال بيها قبل 25
عندى شغلى اللى اتقنه واتقى الله فيه علشانها,عندى رائ اللى ماخفش اقوله بعد كده
عندى صوتى اللى هشارك بيه علشان احدد مستقبلها

* من سترشح لرئاسة الجمهورية؟ ولماذا؟

ولا حد لحد دلوقتى لان كل الموجود يا اما نزل من نظرى بعد التنحى زى عمرو موسى يا اما ماكنتش حباه اصلا زى البرادعى يا اما ناس لسه مش باينلها برنامج او منهج زى الباقى يا اما ناس الغرض من ترشيحهم الضجة الاعلامية فقط وبالتالى اللى هيفرق اعتقد البرنامج الانتخابى

 * لو أصبحت رئيسا لمصر ما هي أول ثلاث قرارات لك؟

الاهتمام اكتر بامن مصر خارجى وداخلى,اعادة علاقات مصر بدول الجوار الدول العربية والافريقية والاسلامية واعادة توزيييييييييع المبانى الحكوميه على البلد كلها والغى المركزية بتاعه القاهرة دى
وكمان كل محافظات الدولة تبقى على قدرة لاستقبال اى وفود خارجية مش شارم والقاهرة بس

* لو أعطوك نصيبك من المليارات المسروقه, ماذا تتوقع أن يكون نصيبك منها و ماذا ستفعل بهذا المال؟

ويدوهالى لى  يا جماعه دى فلوس الدولة بمعنى لازم يتبنى بيها الدولة تانى اقتصاد مصر فى الضياع يعنى بتوجع لما بتابع على شبكة رصد ان مصر هتعلن افلاسها قريب جدااااااااااااا


* بمرر التاج ل


يعنى شرين مررته للكل يا جماعه ههههه
فانا احب اديه ل
Timoصاحب مدونة اسف على الازعاج


 

هناك 8 تعليقات:

Casper يقول...

بالتأكيد كلنا مكناش متوقعين كل ما حدث
بكل المقاييس ثورة 25 يناير أشبه بما يحدث في الأساطير لكنها تحققت على أرض الواقع

___________

اجابات جميلة
خالص تحياتي

faroukfahmy يقول...

اجابات صريحة وصادقة ومميزة واهم شئ ان تكون الاجابات غير تقليدية كعهدنا بك

Unknown يقول...

اجابات مختلفه و صريحه بتفق معاك في معظمها بس (مع عدم اعجابي بيه) مصطفى بكري مكانش مهللاتي طول عمره مغضوب ليه و معارض...و بعدين متخافيش يا بنوته على الاستقرار عشان مصر مش دوله صغيره أو فقيره و زي ما هما نزعوا مننا الأمن عشان يكرهوا الناس في الثوره و معرفوش, الأمن راجع بشكل أفضل و المستقبل أكيد أجمل طول ما السلطه بتتداول و اللي بيغلط عارف ان آخرته طره, كله هيعمل حساب للحق مش للنفوذ.
سعيده بإنك اخدتي التاج لأنك كاتبه جميله و خليتي التاج أجمل
تحياتي و كل الود لكي

سواح في ملك اللــــــــــــــــــه- يقول...

اختنا نور
يامساء البنات الجميلات الدلوعات العفويات
عفويتك جميلة وفيها طيبة وبراءة وصدق
الاطفال
تشبهي في كلامك صورتك اللي علي المدونة
اجاياتك كلها جميلة يانور
تحيتي

reemaas يقول...

تسلم يا كاسبير واعتبر التاج ممرر ليك واعمله انت كمان

reemaas يقول...

ربنا يعلم انى صادقه فيها يا فروق ويلا اعمل التاج انت كمان

reemaas يقول...

لا لا ياشيرى انا ماقولتش طول عمره انا قلت فى خلال الثورة يعنى كان فى الاول حنين مع الحكومة وبعدين طلع قال يا جماعه نرحم الريس واول ما تنحى سلخه

reemaas يقول...

تسلللللللللللم يا خالد انما انت ساكت بقالك كتير ومش بتكتب ليه يلا اعنل التاج