ياخالة قمر ياللى عجينك خمر ياللى
قومى قرصيه
واساعدك فيه
ادينى رغيف
ابيض ونضيف
قومى اخبزيه
كسلانة ليييييه
كانت من احلامى قبل الثورة انى بلدى تبقى نضيفة ,من غير زبالة فى الشوارع
ولسه ده حلمى لحد دلوقتى ...
نفسى امشى مالقاش اكوام زبالة جنب جنينة ولا جنب جامع ولا مكان غير مكانها الطبيعى اللى هو صندوق الزبالة
نفسى اركب عربية ومالقاش حد بيرمى كيس الشبسى ولا المنديل ولاالكانز من الشباك
فى بلد معينة بعدى عليها وانا فى العربية فى طريقى للمنصورة البلد دى اهلها بيعملوا حاجة غريبة
بيحطوا اكياس زبالتهم على الرصيف اللى قاسم الطريق الرئيسى لحارتين رايح جاى
طول مانت ماشى بطول البلد الفاصل مرصوصة عليه الاكياس بدقة عجيبة
الحال ده من زمن على فكرة ونفسى افهم ليه؟!
ياخالة قمر ياللى
ياللى وحشانى
ضمينى تانى
بجناح حنانك
راح فين زمانك
زعلانة منى؟
كان غصصب عنى
وانا اعمل اييييه!!!
بحلم ان الناس تفهم الفرق بين عضو مجلس الشعب والمجلس المحلى
نفسى يبطلوا يحلموا ان عضو مجلس الشعب هو اللى هينضف الشوارع وينور العواميد ويشغل الناس
هو اللى هيزود حصة البلد من انابيب الغاز ولا هو اللى هيخلى اللى بيوزع العيش يعدى فى معاده
نفسى الشباب اللى قام بالثورة واتقسم لانه معملش حزب يجمعه يرشح نفس للمجالس المحلية
علشان تظبط البلد لازم نبتديها من تحت مش من فوق
ياخالة قمر
ايدك معايا
غنى غنايا
القمح جالك
فرح عيالك
قومى اطحنيييه
فيلم ايرانى اخد اوسكار؟
طب يعنى الحكاية مش حكاية احقاد بقى ولا اننا عالم تالت او عرب او مسلمين وهم بقى بيحقدوا علينا وحالفين لنطول السما ولانطول الاوسكار
بحلم انى اشوف فيلم مصرى مفهوم مش على طريقة يوسف شاهين
يدخل وياخد اوسكار ...
بحلم انى اشوف فيلم اكشن مصرى يبهرنى
انى اشوف فيلم خيال علمى مصرى ...
بحلم انى اشوف فيلم رومانسى مصرى يأثر فيا زى تايتنك مثلا
بحلم بده وليه لاء
ياخالة قمر كسلانة ليييه
بحلم ان كل طالب فى مصر يقعد فى الحصة وهو معاه لاب توب بتنزل عليه المناهج اول كل سنة دراسية ,وماتتحزفش المناهج بتاعة السنين اللى عدت بحيث انه يقدر يربط اى معلومة بحاجة هو درسها من قبل
خيالى الحلم؟
ماعتقدش..هيبقى ارخص من طباعة الكتب كل سنة وبعدين بيعها لمحلات اللب والسودانى
بحلم ان المدرس فى المدرسة الحكومية لما يجى يدى معلومة للطلبة مايقلهمش قولوا ورايا يا عيال وبصوت واحد ثورة عرابى قام بها احمد عرابى فى 1919 ..وانت بقى لسوء حظك تعدى جنب المدرسة وتسمع صوت 60 طالب طالع من شباك الفصل بيرددوا المعلومة ورا الاستاذ
ليه مايقعدش بهدوء وبصوت واطى وبدون استذاف للحناجر ويحكيلهم اللى حصل فى الفترة دى ويطلب منهم هم يدورا على المعلومات الثابته على النت مثلا ويناقشهم فى نتايج بحثهم ده فى الحصة الجاية ويبقى ده الواجب بتاعهم ويبقى كده علمهم يدوروا على المعلومة بدل ما بيحفظوها
ياخالة قمر ياللى
تسلم اديكى
واللى يناديكى
ردى عليييه
دول حلمين من احلامى وحاسة انهم مش معجزات يعنى
ولا انا بحلم بالمدينة الفاضلة ولا انا مش واقعية ومش عايشة عيشة اهلى
لا
دى اقل اقل الحاجات اللى يستحق يعيشها اهلى
واللى نفسى الاقى ناس فكرت فيها وقاعدة بتجهز ليها دلوقتى
وكل ده بعيدا عن السياسة
نفسى كل واحد فيكم يحط حلم او حاجة نفسه يشوفها بعيدا عن السياسة حتى لوكانت مجنونة
ممكن نخرج بمجموعة احلام اكيد قابلة للتحقيق
