تويتات حامل 9

وقفنا فييين .. اه
اتصلت بباك وانا بعيط لدرجة انه اتخض .. فيه ايه يابنتى
الحقنى يا محمود الدكتور قالى هولد النهاردة وانى اسبقه على المستشفى هيخلص العيادة ويجى يولدنى
الدنيا اتشقلبت بقى .. جدتك بقت بتجرى تحضر الحاجة وجدتك ام بابا تعيط لانها كانت متجبسة ومش هتعرف تحضر الولادة .. ركبنا العربية والكل متحمس وانا هموت من الرعب ..
وصلنا وانا بحاول اضحك مع اللى حوليا بس الخوف مسيطر لدرجة انى حاولت اشغل نفسى واتخيل ملامحك بس الممرضة قاطعتنى وقالت يلا نجهز!
دخلت اوضة العمليات وخالتك اقنعت الدكتور تحضر العملية معايا .. طلعت فوق سرير العملية ودكتور البنج بدأ يشرحلى ويقنعنى انه يدى البنج النصفى من غير ماينيمنى وافضل صاحية خلال العملية.. ماستحملتش الحقيقة من الخوف لقتنى بقوله لا نيمنى مش هقدر .. وبالفعل نمت ماعرفش اد ايه وصحيت لقيت اول حد اشوفه باباك وهو مبتسم وبيقولى قابلة ياستى ابننا .. عمر 😄

تويتات حامل 8

المفروض تبقى تويتات مامى بقى لكن لأنى اتكلفت والولادة جت بدرى فبقالى فترة ماكتبتلكش..بس استحالة افوت عليك اليوم اللى نورت حياتى فيه 😁
انا ياسيدى كان عندى متابعة عادى مع الدكتور اياه .. رحت فى معادى وكانت العيادة زحمة اوى فضلت منتظرة وكانت قاعدة معايا واحدة تعبانة اوى وبتتألم جدا لدرجة خوفتنى .. سألتها انتى فى الكام قالتلى انها زى حلاتى فى أول التاسع والدكتور محددلها نفس يوم ولادتى بس تعبت وفضلت تعيط من الالم وانا اتعجب واقول الحمد لله انى مش حاسة زيها .. دخلت للدكتور وقالها هتولدى حالا وراح سابنا علشان العملية .. بينى وبينك انا اترعبت .. مو ممكن يحصلى زيها؟! لا لا دى تعبت انا تمام اهو .. اينعم بدأت احس بتقل كده بس عادى .. اينعم حاسة انى مش مرتاحة ومش عارفة اقعد بس عادى برده ممكن نفسيا
من هنا لهنا الدكتور جه ودخلت وكشف وانا كنت ناوية اقوله نستنى اسبوع كده علشان ابوك مسافر 😂
لقيته بيقولى هتولدى النهاردة 😱
ازاى يعنى يا دكتور؟!
ابدا السائل حوالين البيبى متعكر كده لازم يخرج
مش عارفة  بقى اوصغلك .. كوكتيل احاسيس كتير من خوف عليك لفرحة انك هتخرج لخوف من العملية لخوف ابوك مايعرفش يحضر بسبب سفره لخوف من الدكتور نفسه .. كل ده طلع دموع كتيييير .. سيل من العياط ماتفهمش جت ازاى
خرجت اكلم ابوك وابلغه..
اكملك بعدين بقى لأن جنابك صحيت وقصيدة الواء واء اشتغلت 😂

تويتات حامل 7

أحاسيس غريبة حستها مع الحمل لو كان حد وصفهالى ولا كنت هفهم الا لما أعيشها .. يعنى مثلا أنا بقيت حساسة جدا فى كل حاجة حساسة جسمانيا لدرجة عجيبة حساسة نفسيا اى حاجة بتأثر فيا ودموعى القريبة قربت أكتر واكثر .. حتى معدتى اللى كانت تهضم الظلط زى ما بيقولوا مابقتش حتى قادرة تهضم كلمة مش فى محلها

تويتات حامل 6

اتمنيت من ربنا كتير تطلع ولد .. مش لأنى مابحبش البنات بالعكس دول نعمة ورزق  بس لأنى طول عمرى حتى قبل جوازى كان نفسى البكرى بتاعى يبقى ولد .. انا ماليش اخوات صبيان وطبعا جدك توفى فى وقت حرج من حياتنا فحسينا يعنى اى أم وبنتين يواجهوا الدنيا العجيبة دى من غير راجل .. نفسى تطلع ولد وأربيك تربية تبقى بيها راجل وسند لينا فى حياتنا .. مش بعيدة على ربنا 😊

تويتات حامل 5

فكرة انى مسؤلة عند حد مرتبط بيا فى اقل حركة دى فكرة غريبة جدا ومرعبة .. يعنى ماتخيلتش ابدا انى لازم اكل مش علشانى لأ علشانى انا وانت واختار كويس نوع أكلى مش الرمرمة اللى كنت بعملها قبلك  ... لازم انام كويس .. لازم ابقى هادية وماتنرفزش لأن ده بيتنقلك وبيأثر عليك .. ماينفعش اخد اى دوا لانك هتتأثر .. دموعى بتأثر عليك .. ضحكى بيأثر عليك نفسيتى بتأثر عليك .. بقيت بحسب حسابى حتى فى النفس بتاعى علشان خاطرك .. ارتباط رهيب اسمع عنه بس انت عيشتهولى

تويتات حامل 4

انى ارضى بكل حاجة غريبة بتحصلى بسببك دى حاجة كنت اسمع عنها بس مافهمتهاش الا لما بقيت حامل.. يعنى مثلا اللى كان يقولى هتتخنى كنت ممكن اقتله اهو وزنى زاد كتير وراضية علشانك.. رجلى ورمت واتبهدلت ترجيع وعادى حاسة ان كل ده حلو .. بالعكس حاسة ان ده بيطمنى عليك اكتر .. يعنى حركتك بتقلقنى وتتعبنى وتصحينى من احلاها نومة بس لو ماتحركتش بيبقى يوم ماطلعتلوش شمس وتفضل دماغى تودى وتجيب لحد ما تحن عليا وتتحرك ولو حركة صغيرة

تويتات حامل 3

من خوفى عليك قررت اتابع الحمل مع دكتور هنا فى نفس البلد بتاعتى .. بس راجل عجيب اوى بيقولك من المدرسة القديمة .. الراجل مابيتكلمش ولا سمعنى صوتك ولا ورانى صورتك زى مابشوف فى الافلام  بجد حرمنى من حاجات كتير معاك رغم انه شاطر بس فعلا من منغصات الحياة بالنسبالى .. يعنى انت بالنسبالى هتبقى مفجأة فى كل شئ ..