S.M.S 1

فى حاجات ماينفعش تحاول فيها..

ماينفعش تحاول تحب او تحاول تكره..ماينفعش تحاول تفرح او حتى تزعل

دى حاجات بتطلع من جواك لوحدها ماينفعش تحاول تعملها

مع نفسى 15

الناس نوعين..نوع ماشى فى الدنيا بيعافر فيها..تلطشله وبيعاند فيها لدرجة انه مش شايف تفاصيلها,شغلاه تفاصيله هو اكتر..

ونوع تانى زى حلاتى راكب قطر او عربية على حسب ريتم حياته وبيتفرج على الدنيا من شباكها بيتابع تفاصيلها ومبهور بيها ونفسه ينزل يعيش زى اللى عايشيين بس خايف..خايف يبقى جوة الصورة

******************

احساس غريب لما تكون فرحان علشان المفروض تبقى فرحان,متفائل علشان الكل بيقولك المفروض تبقى متفائل..بتحلم علشان فيه حلم ادامك والمفروض تكمله تيجى تدخله تحس ان هو حلمك العنوان بيقول كده بس التفاصيل مش تفاصيلك مش عارف تتعرف عليها..فيه شبه اه بس مش تفاصيلك

*****************

 

مع نفسى 14

احيانا الواحد بياخد على حالة الحيرة اللى عاش فيها وقت طويل لدرجة انه لما يصادف حالة استقرار..بيحتاس بيها!!..بيخاف منها..وبياخد وقت على مايتعود عليها..

المهم تصبر هى عليه بقى!

**************

من اصعب الحاجات انك تبقى مفروض تاخد قرار اقف ولا امشى؟..افضل زى مانا ولا اتحرك؟!..

انا كده كويسة..طيب لو غيرت كده ده هفضل كويسة ؟ ولا هبقى احسن؟ ولا هخسر؟

وكتير كتير من علامات الاستفهام!!

 علشان اعرف اجابتها لازم  اقرر الاول...صعبة اوى بجد

عن ..الربع جنية

من يومين كده كنت بحاسب واحد من الزباين وكان بقيله ربع جنيه,ودار بينا الحوار ده..

انا:ثوانى اجيبلك الربع جنيه الباقى

الراجل: خليه يادكتورة مش مهم

انا: لا ازاى ده حقك 

الراجل :مش مستاهلة ياستى ثم هو بقى لسه فيه حاجة اسمها ربع جنيه ده الجنيه نفسه خلاص الله يرحمه اقولك ولا تزعلى هاتيلى بيه اى حاجة مناديل مثلا..

انا:معلش المناديل بنص !

الراجل(وهو بيضحك): علشان تصدقى لما اقوك مش جايب همه ..اقولك هاتى فوار اهضم بيه اللى بيحصل ..واخده ومشى

طلعت انا بقى الربع جنيه من الدرج وفضلت ابصله..يااااااااااااه اد كده مابقاش ليك قيمة؟!

فين ايام زمان..انا فاكرة كوبس وانا صغيرة قبل مادخل المدرسة على طول.فاكرة لما بابا الله يرحمه كان بيدينى مصروفى اللى كنت ببقى مصممة انه يبقى ربع جنيه..حتى لما كنت باخد نص او جنيه كنت بصمم انه يتفك ارباع..ماكنتش بفرح الا لما امسك الورقة اللى ماعرف ان كان لونها ازرق ولا اخضر!

كنت بشوفها مختلفة عن باقى الفلوس وياسلام لو كانت عيدية..ربع جنيه جديد لانج والوانه زاهية كده وتشد..قمة الفرحة

كان بيجيب وقتها حاجات كتيرة..كان بيجيب كل الحاجات اللى انا بحبها على الاقل..بلونات..شيكولاتات..بومب..كل حاجة وخصووووصا البسبوسة ..

كنت انا واصحابى نروح لمحل الحلويات اللى فى اول الشارع وكل واحد معاه الربع جنيه بتاعه ونديهم للراجل اللى عارف طلبنا اليومى طبعا ..كل واحد قطعة البسبوسة المتينة :)

عدت الايام وفضلت معزتى للربع جنيه زى ماهى..احب ادى لاصحابى فى العيد ربع جنيه جديد مكتوب عليه كلمة حلوة واخد منهم بردو ربع جنيه مكتوب عليه كلمة حلوة..

فضلت معانا العادة دى لحد ما طلعولنا فى يوم بحكاية الربع جنيه المخروم..وبعدين سدوا الخروم وعملوا الربع جنيه المقروض الصغنن ده ..بهدلوه يعنى..وماكتفوش بده ..لا..وصلوا الناس لدرجة الزهد فيه حتى ولو كان حقهم !!

حطيت الربع جنيه فى الدرج تانى ولقتنى بقول ..ايييييييه كانت ايام

 

عن.....مش عارفة!!

عن..انك تكون بتعيش علشان تشتغل

عن..الفرحة اللى بتحنسك تقرب منك تيجى تمسكها ولا كأنها كانت هنا

عن..الحلم اللى مش حلمك وانت اللى بتستعبط ولازق فيه

عن..الصداقة اللى قلبت حب وبعدين وقفت لاعارفة تكمل ولا ترجع زى ماكانت..باظت

عن..الاحلام اللى لسه ماتحققتش

عن..القعدة على لسان راس البر

عن..صفحات الكتاب اللى بتقلبها مش علشان خلصتها لا..علشان تحاول تخفى الصورة اللى عمالة تنطلك كل ماتقلب صفحة

عن..الرسالة اللى على موبايلك واللى مش راضى تمسحها وكل ماتقراها تبتسم وتدمع

عن..دقات القلب اللى بقت عملة زى دقات الساعة..وقت بيعدى وخلاص

عن ..لمعة العيون اللى مانت عارف تفسرها ان كانت دمعة حزن ولا فرح ..ولا تراب مالى الجو

عن..الحاجات المناسبة اللى بتيجى فى وقت مش مناسب

عن ..الحاجات اللى مش مناسبة وبتيجى فى وقت مناسب

عن.. اللايك اللى بتلاقيها على الفيس وبتبقى مش عارف  تفسرها بايه..يعنى كده اتصالحنا ولا لاء

عن..المفجأة اللى بتستناها ومابتجيش

عن..الحد اللى بيختاره قلبك  وكل الناس تقولك مش مناسب..حتى هو

عن..السؤال اللى بيفضل يزن فى دماغك..ياترى دماغه مشغولة بيك كده ولا انت بس اللى تاعب نفسك فى الفاضى

عن..انك تكونى بتحبيه وعارفة ان ده حب عمرك قلبك بيقولك كده بس الكل يلومك ويقولك ماينفعش ده اصعر منك..وكأنه ذنبك

عن..انه يكون حد وحش جدا واذاكى جدا وبرده انتى اللى تتلامى ..انتى اللى اخترتى

عن..انك تقررى تروحى وتقوليله بحبك لانك مش قادرة تستنيه وخايفة الوقت يعدى وهو   ساكت وخايفة ماتقوليش وتضيعى فرصة سعادتك..وبرده يفضل ساكت

عن..انك تكونى صح والكل بيلومك وبيقولك انك غلط فتشكى فى نفسك وتقولى اكيد انتى اللى غلطانة ازاى تكونى صح والكل غلط..بس غلطت فى اى

عن..انك تمشى تمشى تمشى لحد ماتنهجى من كتر التعب وتقف تاخدى نفسك تلاقيكى واقفة فى مكانك

 

 

عن .....انى لسه بعرف احلم!!

كنت حاسة انى بطلت احلم من فترة..

اه مابقولش ده..اه بغنى وبقول لو بطلنا نحلم نموت..

اه بتكلم عن الاحلام مع اصحابى و فى المدونات وسعات كمان بتاخدنى الجلالة وبتكلم عنها هنا فى المدونة..!

بس انا من جواية عارفة انى بطلت احلم..بطلت امنى نفسى بحاجات وفى الاخر مابتحصلش..

عارفة انه نصيب..وعارفة ان اللى حلمت بيه وسعيت له وماتحققش يبقى ربنا مش كاتبهولى..وعارفة ان ممكن يكون الغلط منى وانى انا اللى جايز اكون ماسعتش صح وماشتغلتش على حلمى صح وجايز كمان اكون سعيت للحلم الغلط من الاول!!

بس المحصلة ان غالبية احلامى ماتحققتش..وفى احلام منها خلاص ماعدش ينفع تتحقق..مش يأس بس فى نوعية احلام بتبقى مصحوبة بوقت لو عدى منك خلاص خلصت..

وفى نوعية تانية من الاحلام بتبقى مربوطة بالناس..ودى كتيرة عندى الصراحة  ودى بقى مشكلتها انها حتى لو بذلت فيها اقصى مجهودات علشان تتحقق فى اطراف تانية لازم تشاركك فيها  ودول فى حالتى يا اما مش بيعملوا اللى عليهم يا اما مش بيجوا اصلا..وفى الحالتين الحلم باظ..

المهم..انا بقى تعبت من كتر ما الاحلام دى مش بتتحقق وتقريبا علشان ابطل ازعل  ..بطلت احلم..

لحد ما جه اخى العزيز خالد زين صاحب مدونة سواح فى ملك الله واقترح عليا فى تعليق له على الفيس انى انزل كتاب زى مجموعة المدونين اللى ربنا وفقهم وعملوا ده..

ساعتها تنحت لشاشة الكوبيوتر ولقتنى وبصوت عالى بقول انا؟ انزل كتاب باسمى؟

هو ساعتها انشغل وقعد يدور فى المدونات على خطوات اصدار كتاب وانا سرحت بقى..

ياترى هيبقى اسمه ايه كتابى العزيز ده..ياترى هكتب فيه ايه..ولو جمعت كل اللى كتبته فى المدونة او حتى فى اجندتى ينفع يبقى كتاب..؟

طبعا اول حاجة فى الكتاب لازم اعمل اهداء..هعمل اهداء لروح ابى الحبيب ولامى واختى وامنية صحبتى واكيد للاستاذ خالد اللى طالع عينه وعمال يدورلى دلوقتى ده..

ياترى اختار شكل الغلاف ايه ولونه..اه لونه ده مهمة جداااا..لازم يبقى لون شبهى كده :)

ولا حفل التوقيع ..يوووووووووووه ده هيبقى حتة يوم ..اكيد كل اصحابى هعزمهم وهشوف كل المدونين ..هشوف سهاد ودعاء اللى متشحططة علشان اشوفهم ومش عارفة :) اخيرا هقابلكم يابنات ده حفل توقيع كتابى وممنوع اى اعذااار....

تقدروا تقولوا وبكل ثقة انى حلمت بكل التفاصيل.. ده انا جالى احساس بالخوف المصحوب بالفرحة كمان بغض النظر عن انى مش عارفة هكتب فيه ايه..

الحلم ده اخد منى طول الليلة دى وصحيت تانى يوم لقتنى منشكحة جدا...

اينعم بالليل عرفت ان المسابقة بتاعة النشر لمن يستحق خلصت...واينعم لما فكرت شوية لقتنى مش اد الحكاية لانى بكتب لنفسى اكتر وحاسة انى ماعنديش مادة تنفع للنشر

 كل اللى املكه حبة افكار فى الغالب غير مرتبة ولا تصلح انها تترتب اصلا لانها عبارة عن احاسيس ساعة ما بحسها بكتبها يبقى هرتبها ازاى؟؟؟

اينعم الحلم ماكملش..كالعادة

بس ساب فيا تأثير حلو ونجح انه يخلينى مبتسمة طول اليوم ده من برا ومن جوا كمان :)

احلى حاجة بقى..

انى طلعت لسه بعرف احلم...

عن..بيت البيوت..

كنت بتفرج على حاجة سورى تقريبا او حاجة تركى مدبلجة بالسورى غالبا..وكان فيه طفلة بتلعب لما سألها حد بتعملى ايه قالتله بلعب ((بيت بيوت))..

ساعتها سرحت-وانا بسرح كتير باين اليومين دول- وافتكرت ايام زمان..كنت بحب العب اللعبة دى انا واصحابى كتير بس ماكنش اسمها كده ..كنا مسمينها((سكنة)) -بضم السين- نخلص جرى ونط الحبل وكهربا ولما نحب نهدى بقى نقول يلا يا عيال نسكن..

كل واحدة من صحباتى بتجيب فنجان من فناجين مامتها اللى مستغنية عنها طبعا..وانا عندى الصنية وعندى الورد وعندى المية..وطبعا مفهومة ان المية بنملا بيها الفناجين علشان نشربها والورد علشان ناكله..ايون كنا بنقطع ورقه وناكله :)

وكان بيبقى التجمع عندى بسبب توفر المكان .. واقدملهم بقى-بما انى صاحبة البيت- الصنية عليها فناجين المية والورد ونفضل نشرب وناكل لحد مايجيلنا تخمة او يجى معاد مرواحهم..

ايااااااااام....