سأفتقدك جدا

      



                                    
                                          سأفتقدك جدا
 حين تتساقط الامطار وتملئ رائحة الارض المكان وارتجف بردا,وارتجف شوقا,وارتجف رعبا,ويشتد حولى الشتاء
                                            سأفتقدك جدا

حين ياتى الليل بلا صوتك وبلا طيفك وبلا دفئك وابحث عنك فى رداء القمر ولا اجدك واعند كالطفلة الجريحة فوق صدر السماء
                                         سأفتقدك جدا

حين يمد الى احدهم ذراعيه وينتشلنى من بحر احزانى ويمنحنى اجنحة ودماء جديدة وحياة جديدة ويسأل عنك قلبى فى خجل وتحن اليك فى عروقى الدماء

                                       سأفتدقك جدا

حين اتناول طعامى ولا تكن فى المقعد المقابل,ولا المقعد المجاور,ولا المقعد القريب ولا البعيد واجلس وحيدة تسألنى العيون من الغرباء

                                      سأفتقدك جدا
حين اردد امامهم كاذبة انى نسيتك وان امرك ماعاد يعنينى وان فراقك ما عاد يضنينى وانى لا اعود فى المساء كالطفلة الى سريرى ابكيك فى الخفاء

                                     سأفتقدك جدا

حين اعترف بينى وبين نفسى ان الرسائل التى احرقتها احرقتنى وبان الهدايا التى كسرتها كسرتنى وان البقايا التى قتلتها قتلتنى وبان مشانق النسيان التى اعددتها وحدى انتهى تحتها فى المساء

                                   سأفتقدك جدا

حين تحدثنى عنك اخرى وتسرد حكاية شوقك واشم عطرك فى يديها
     فاشتاقك اكثر!
    وارفضك اكثر!
    واحبك اكثر!!
    واكرهك بلا انتهاء!!!!!!!!

                                   سأفتقدك جدا

حين يسألنى عنك قلبى واصمت,ويسألنى عنك عقلى واصمت,ويسألنى عنك ليلى واصمت,ويسألنى عنك هاتفى واصمت!!واتحول الى قالب من الثلج يقتات الصمت فى كبرياء
                                  سأفتقدك جدا

حين اعلم انك عشت بعدى الف حكاية حب,وكتبت بعدى الف قصيدة حب,وعشقت بعدى الف امراءة حسناء
ومع ذلك...........
مازلت تبحث عنى بين النساء!
                                  سأفتقدك جدا
                        .........................................................................

اسفة جدا على تكرار البوست لانه نزل قبل كده فى 2010 بس كنت محتاجة انى اقوله تانى
  

يوم حلووووو

من احلى الايام ويمكن احلى يوم عدى عليا من بداية السنة العجيبة دى

ليله 19 مارس ويومها بجد كانوا اكتر من روعه كنت فرحانة فرحانة جدااااا


السبت بالليل اتصلوا عليا شلة المجانين بتاعتى ولقيتهم متفقين بربطة المعلم انهم يتجمعوا عندى وده كان لسببين اولهم انى مش فاضية اروحلهم الصيدليه حكمانى وتانيهم ان المدرسة اللى ناويين نصوت فيها جنب الصيدلية من باب معاينة موقع الحدث يعنى

هاتيجوا امتى يا عيال قالوا على 7ونص كده<ضاعت حلقة العشق الممنوع يلا ماعلينا فدى مصر>
وقد كان على 8 كده اتجمعوا كنا اتنين صيادلة واتنين تربية انجليزى وطبيبة وواحدة دبلوم صناعى ..وانا

متجمعين ليه بقى ؟...علشان نناقش طبعاونشوف هنعمل ايه فى حدوتة بكرة دى

انا وواحدة من الصيادلة والطبيبة كنا نعم والباقى لا ونقنع بقى فى بعض كل واحد مقتنع بسبب وشايف ان ده احسن وضع من وجهة نظره

احسن وضع لايه؟....لبلدنا طبعا
بزمتكم مش حاجة تفرح وانتهت الناقشة على ان كل واحد متمسك برائيه ومقتنع بيه اكتر من الاول وانتهت الليله وروحنا وجه يوم الاحد الموافق 19 مارس2011
احفظوا اليوم ده علشان اصلا مافيش معاكم اى خيار تانى هو كده كده يوم محفوظ فى الذاكرة

اتجمعنا فى الصيدليه عندى على الساعه 2 بعد الظهر ورحنا على المدرسة اللى بتبعد عننا حوالى 100متر واحنا مبتسمين جدا وكل واحدةماسكة بطاقتها فى ايدها

على باب المدرسةاتنين عساكر من الجيش.....مبتسمين!!!ميلت على سماح وقولتلها هم مبتسمين ولا انا اللى بيتهيألى وشايفة كل حاجة بمبمى قالتلى اه يابنتى اهى ابتسامة عريضة اهى

وقفنا فى الطابور اللى ماكنش طويل اوى يعنى ودخلت صناديق وناس بتسهلك كل حاجة وواحد قاعد كده عليه الهيبة عنيه بتراقب كل اللى حواليه بطريقة تحسسك بالامان اخدت الورقة بعد ماسلمت الراجل البطاقة ياخد بيانتها وانا ببص حواليا مافيش ستارة!!   مش مشكلة وبحركة تلقائية والله العظيم حطيت الورقة فوق الصندوق ورحت معلمة على موافق وانا بدارى على الورقة   تسالنى ليه هقولك ماعرفش!  الاحتياط واجب برده  حطيتها جوا الصندوق ومضيت قصاد اسمى وجاية اخرج لقيت اللى بيندهلى ويقولى صوباعك   ....اتلخبطت بينى وبينكم مانا جديدة لنج فى حكاية الصناديق والصوابع دى واصبح صوباعى بمبى ويا له من احساس
 حلو اللون البمبى:)

خرجنا وتفرقنا كل واحدة راحت تشوف حالها بقى وفضل اليوم جميل فى نظرى رغم عدة محاولات لتحويل الاحساس ده لزعل ولغيظ ولكن هيهات

كنت متوقعه انى اسمع ان فى لجان فى مصر حصل فيها خناقات عادى وبالتالى ماندهشتش ولا اتغير احساسى الجميل

عرفت بمحاولة ضرب والتهجم على البرادعى امممممممم يعنى طبعا العنف مرفوض بشتى انواعه بغض النظر عن انى مابحبوش وبغض النظر عن انه غلطان انه يغير لجنته فى اخر لحظة ويختار لجنة فيها ناس كتير كده ومش معروف شعبيته فيها عامله ازاى مش وقت استعراض يعنى  وبغض النظر عن حاجات كتير العنف مرفوض
بس بررررررده انا ماتهزتش مبسوطة لسه

وفضلت الحالة دى معايا وانا مستنية النتيجة ومجهزة نفسى لكل الاحتمالات عادى جدا

نعم ..هى النتيجة   مش عارفة اقول بقى فرحتى كانت علشان نعم فازت ولا علشان عرفنا اللى جاى بصورة عامة شكله ايه ولا علشان صوتى فرق ايا كان النتيجة 

المهم انى فرحاااانة

لحد ماجت العاشرة مساء ومنى الشاذلى وضيفها ضياء رشوانالخبير الاستراتيجى فى مركز الاهرام...كلام مستفذ الى ابعد الحدود عرفته على انه حد محايد لافرح بالاه ولا باللاء مافهمتش ازاى يعنى ماصوتش؟؟

لا هى كانت بتهرج الراجل مصوت وزى الفل وقايل لا عادى يعنى وحلل الموقف على ان اللى قال نعم معظمهم مابيعبروش عن الدستور اد مابيعبروا عن الاخوان او السلفيين او الاقباط او اللى متعودين على نعم وخلاص او اللى شايفين ان الاخضر احلى من الاسوداو.......................مش فاكرة الباقى بس مافيش فيهم حد بيبعبر عن رائيه تقريبا

ويراهن الخبير بوظيفته وبقلمه كصحفى ان اغلبيه اللى صوتوا ماقروش التعديلات اصلا وكأن اللى راحوا دول مابيفهموش او وكأن الحال ماتبدلش واحنا لسه مامالناش رائ
او وكأن الناس مش شايفه التعديلات طول النهار بتتفصص من المناقشة على شاشات التليفزيون بكل اتجاهتها تقريبا

واللى خفت منه حصل .....بدء ضغطى يعلى وكادت محاولة تعكير الفرحة تنجح لولا

الرمود كنترول ربنا يصلح حال اللى اخترعه   وطبعا غيرت القناة

وبقية الفرحة

سؤال بقى وده لجهلى باجابته وليس للسخرية للعلم

هو يعنى ايه خبير استراتيجى؟
                                                                     يجعله عامر   

وانا فى الميكروباص

ركوب الميكروباص ده محتاج زهن صافى على فكرة علشان تدقق فى كل اللى بيحصل واللى بيتقال حواليك
وبما انى بحب اسمع جدا اكتر من حبى للكلام<على فكرة دى مش موهبة زى ما الناس فكرة دى حاجة انت بتتعلمها لو حابب>فركوب الميكروباص ده ممتع بالنسبالى لو دماغى فاضيه ومش مشغولة امر جلل يعنى

امبارح بقى كنت رايحة المنصورة والمسافة من مدينتى لمدينة المنصورة ساعه تقريبا
عاوزة اقولكم ان فى خلال الساعه دى اتفتح فى الميكروباص كميه موضوعات صعب جدا حصرها<موضوعات عامة يا جماعة لتفتكروا انى برمى ودانى ولا حاجة>من الموضوعات دى حبة حاجات كده لفتت نظرى هلخصها ليكم فى نقط

اول حاجة:السواق راجل بسيط جدااا واعتقد انه مش متعلم اساسا لقيناه مره واحده
               بيقول الحمد لله يارب انك وريتنى يوم فى مبارك ومراته فالناس ابتسمت
              وسأله واحد انت كنت متضايق منه كده يا اوسطة؟ قال منه هو لا لحد 
              ماتتثبت السرقات وقتها هتضايق بجد فالناس استغربت امال انت ايه
             اللى مزعلك منه رد بقى باغرب رد ممكن اتخيله
              "انا متضايق ومتغاظ من سوزان هى اللى قوت الستات علينا وخلت
               مراتى تخلعنى!!!!!!!!!"
               من هنا عرفت ان كل حد بيدور على شماعه للمصايب اللى حصلتله فى 
                حياته
تانى حاجة:برده كانت السواق الفانى اياه الراجل كان ماشى والطريق زحمة جدا
               وكان شادد الحزام ومرة واحدة لقيناه راح فاكه وبيقول بصوت عالى
               "ده انا الوحيد اللى رابط الحزام فى كل السواقين اللى حواليا ليه يعنى"
               
                وقتها برده عرفت ان مفهوم الحيات عندنا هياخد وقت كبييير على 
                  مايوصل بكل معانيه لكل الناس
 تالت حاجة:اتفتحت موجة من كلام الناس بقى عن الثورة اكيد ولقيت واحد قدامى
                بيقول والله ياجماعه ده انا رايح المنصورة للمرور اشتكى موظف 
                 التراخيص اللى عندنا مش قابل برخصة عربيتى الاجرة وعاوزنى 
                 اغيرها بحاجة تكلفنى 1000ج رد عليه واحد وقاله طب وانت اي اللى 
                 موديك المرور عليك والحاكم العسكرى اللى عندنا الجيش اللى بيحل
                 اى مشكلة  ياسيدى
                رد الراجل صاحب المشكلة لا ياسيدى اروح الاول لاولى الامر ماحلوهاش
                  ابقى اروح للجيش
                  عجبنى جدااااااااا الوعى ده ويارب يبقى عند الكل

رابع حاجة:فى وسط الكلام بتاع الناس لقيت واحدة ست جنبى شايله طفل على ايدها
               بتكلم نفسها وبتقول والله انا نفسى حد يقول لبتوع الجيش دول ان
                الاسعار ولعت ده كيلو الطماطم بقى 4ج وكيلو الخيار بقىب4ج
               وحتى الفول النابت اللى طول عمره ب1ج بقى ب4ج
               ماقدرتش اسكت انا بقى ورحت قولتلها هو سعر موحد ولا ايه كله 
               ب 4 راحت بصتلى كده وقالتلى لا ياستى كيلو الليمون ب8ج احسبيها
               كده معايا الواحد يعمل ايه 
                بصراحة ماعرفتش ارد
خامس حاجة"وسط كل الكلام ده احب انوه ان القراءن كان شغال فى العربية
                   وعالى جدا واذ فجاءة والكل مندمج فى الحديث يطلع واحد من اخر 
                    العربيه ويقول وطى الصوت ياسطة السماعات ورا ودانى دوشتنى
                   طبعا ممكن تتخيلوا اللى اتقال للراجل واللى اتقال بصوت واطى وهو 
                  ماسمعوش
                     ياخى حرام عليك ده قراءن
                    ماهو لو كان اغانى كنت زمانك مبسوط
                      يعنى انت الوحيد اللى تعبان ياسيدى
                      اه والله عنده حق ماحدش سامع اصلا
                    ورينا شكل اللى بيتكلم ده
                     وهوب راح السواق حسم الموقف واطفى الراديو
                      وسكتت الهمهمه


انتهت الساعه على خير والحمد لله وفضلت انا فترة بعدها دماغى مشغول بتحليلات الناس البسيطة للموقف بعيدا عن تعقيدات المحللين 

فضلت افكر ان كل واحد بيحلل الموقف حسب المشكله اللى بيواجها او الموجودة بحياته بعيدا بقى عن قضيه الديموقراطيه والحريات اللى شغلة البعض الاخر

ومن الميكروباص البسيط وجدت ان المشكلة المشتركة حاليا بين الكل هى الامان والاستقرار وماغير ذلك كله عبارة عن اولويات تختلف من شخص للاخر حسب احتياجات
                                                               ويجعله عامر

بدق باب

كل مرة ادق باب
يفتحلى واحد قلبه داب

اصعب عليه ونصير صحاب

اسأله فين طيب نروح 

يقولى دور عالطموح

طموحه يملانى بجروح

تطلعلى روح من جوا روح

كل مرة ادق باب

♥.-.♥..-.♥.-

مملقتش حد يعزنى

ولاعمر حد حسنى

م انى بركان من حنان

بيهزهم ويهزنى

كل مرة ادق باب
♥.-.♥..-.♥.-

حتى اللى بين حب ظاهر

اقتنع انه طاهر

فاجاءة بانله الف ناب

مانا كل مرة بدق باب
♥.-.♥..-.♥.-

وادينى واقف من زمان

مستنى الاقى الحب بان

وعمرى ضاع عالببان

ولان طعم الوحدة مر

القى الحنين جرجرنى جر

عشان ادق اى باب

يفتحلى واحد قلبه داب

اصعب عليه ونصير صحاب

                                                               كلمات ميدو زهير
 
 
 

فى تغيير

مافيش شك ان كلنا شايفين ان حال البلد بيتغير وان حال الناس كمان بيتغير ولازم يتغير فى مننا اللى شايف التغيير ده للاحسن وفى مننا اللى شايفه للاسوء وفى مننا اللى مش عارف احنا رايحين فين

انا نفسى طول الشهر اللى فات ده تضاربت مشاعرى تجاه الاحداث بطريقه متفاوتة

الاول كان فيه قلق وبعدين ترقب ويليه غضب ثم حزن ثم شك فشك فشك وتتسارع المشاعر بع كده من فرح لقلق تانى لعدم فهم ولحد دلوقتى حاسة انى مش فاهمه وان ماحدش فاهم علشان يفهمنى وكل واحد فهمه مقضيه وعايش على كده ويبقى السؤال
هو مين مع مين ومين ضد مين؟؟؟؟؟؟؟؟؟؟؟؟؟؟؟؟؟؟؟؟؟؟

صدعتكم انا بدماغى واللى فيها بس حبيت اختصر الحكايه لو صديقتى هبه حبة تدخل دماغى هههههههه مانصحهاش الصراحة

المهم قررت انى وسط كله ده محتاجة انى افرح بحاجة اوابتسم بسبب حاجة غير القذافى طبعا
فقررت انى اشوف اى اللى اتغير فى الناس اللى حواليا شخصيا من يوم 25 يناير لحد النهاردة
واحد:رغم انى من مشجعى كرة القدم بس مبسوطة اوى ان فيه حاجة لامة الناس وشاغله تفكيرهم غير الكورة

اتنين:عمرى ماتخيلت ان ممكن حوار يحصل بينى وبين سمسمة وشوشو صحباتى
          ويكون مضمونه الدستور ومواده 

تلاتة:عمرى ماتخيلت انى هدخل على البنت اللى معايا فى الصيدليه والاقيها فاتحة 
            على قناة غير الاغانى والافلام وياللعجب اخبارتطور مذهل
اربعه:ماتخيلتش ان ممكن يجى اليوم اللى تبقى السياسة محور حديث بين اى تنين
           من غير ما الاول يقول للتانى اى الكلام الكبير ده

خمسة:عمرى ماتخيلت انى ممكن انقد وضع معين ولا حد معين من غير ما امىمثلا
           تقولى بس يانور ماتقوليش الكلام ده بره مش عاوزين مشاكل

ستة:عمرى ماتخيلت انى ممكن اقول اى نقد ومحدش يقولى شووووووو وطى صوتك
          هتودينا فى داهيه

سبعة:عمرى ماتخيلت انى هفتح الفيس بوك مالاقيش ناس بتلعب كويزيز ولا بتكلم 
        خالتى فتحية(وطبعا المتقدمين فى الفيس بس اللى هيعرفوا فتحية دى

ثمانية:ماتخيلتش انى هشوف علم مصر مرفوع على العربيات فى مناسبة غير
             المباريات الدولية

تسعة :ماجاش بردة فى بالى انى ماعتش هسمع كلمة معلش اصلى ماليش فى 
             السياسة والجميل بقى ان لما حد قال لحد تانى قدامى وانت ايش عرفك
               ولا فهمك فى السياسة رد عليه وهو ينفى تلك التهمة الفظيعه ومافهمش
                ليه يعنى لا افهم ونص

عشرة: وهى الاهم بالنسبالى  يا جماعة انى من يومها مابقتش اتسأل السؤال المعهود
            هو انتى ليه ماتجوزتيش لحد دلوقتى؟!
          بقالى دلوقتى شهر بالظبط ماسمعتوش لان الناس فى بلدنا انشغلت بحاجة
            تانيه وهى مصر وطبعا مصر اهم من الموضوع ده بكتير وياااااااااااااارب
              ياااااااااااااااااااارب يفضلوا مشغولين بيه وينسونى شوية

ومن السابق ذكره وردا على اللى بيقولوا مش شايفين تغيير ايجابى انا شفت ولمست  
 وحصلى تغييرات ايجابية ممكن يشوفها البعض تفاهة او مش مهمة بس انا شايفاها 
غير كده لانى ماتخيلتش فى يوم انها ممكن تحصل وبالتالى هى تغييرات تغييرات دىولا مش تغييرات؟
                                                                    ويجعله عامر     

زعلانة بجد

للمرة المليون بنقول الثورة كانت مجرد بداية لحاله من التغيير لازم كلنا نمر بيها

للمرة المليون قولنا لو سقط نظام ده مش معناه اننا بقينا كويسين لان لو جه نظام تانى واحنا زى ماحنا  يبقى مش هيحصل حاجة بالعكس احنا اللى هنفسد اللى جاى

للمرة المليون بقول بلاش نخون بعض

لما خرج الشباب فى 25 يناير كان فيه كتير مستهون ومش متوقع تغيير ويوم 28 كلنا اجتمعنا على الغضب والقهر 

ولما خرج خطاب الريس انقسم الشارع وكتير بكى

هل اللى بكى خاين؟هل اللى بكى عميل؟
لا طبعا والف لا
لما بدخل على الفيس دلوقتى بلاقى مهازل بحس معاها ان مافيش اى تغيير حصل

ادخل امبارح الاقى لينك مبعوتلى ومطلوب منى اعمل شير له اللينك ده بعنوان القائمة السوداء لعملاء النظام والخونة

دخلت قلت اكيد جايب الوزراء مثل او الفاسدين او اللى اخدوا فلوس البلد والاقى الفاجعه الكبرى

فيه صور واسامى لمشاهير كل الل ى قالوه لا لاهانة الريس  ونعم للبقاء حتى سبتمبر
المشاهير دول منهم صحافيين وفنانين 

اى التهريج ده هو احنا هنبدء نخون بعض ونحجر على رائ بعض ولا ايه

ياجماعه دول رائيهم كده وبحييهم عليه زى اللى كان رائيه انه يمشى وبرده بحييه عليه ومش معنى ان مطلب الرحيل اتحقق ان دول انتصروا على دول لا معناه بمنتهى البساطة ان التغيير بالطريقه دى هو اللى هيحصل لان كده كده فيه تغيير


ياجماعه احنا كنا بننقد النظام السابق علشان ماكنش بيسمعنا او مابيسمعش الا نفسه
طيب امال اى الحال دلوقتى مابرده كده مش عاوزين نسمع الا نفسنا وان اللى قام بالثورة او شجعها يبقى هو اللى صح والبقى غلط وياريتها غلط بس لا لا ده بقى عميل وخاين كمان


اى معنى ان بلال فضل امبارح يطلع على دريم ويقول مظاهرة عرفان الجميل دى تهريج وعماله ولازم نفوق طب فرق ايه عن اللى قال ان المطالب بالرحيل عميل


اللى حابب يتظاهر علشان حاجة طالما بطريقه سلميه هو حر مانحجرش عل بعض ونحط ادينا فوق افواه بعض علشان نخرس الصوت لان الصوت مش هيتخرس وكبت التعبير بيولد انفجار وادينا شفنا مثال حى له


مش من حق اى حد يتهم مصرى بانه عميل او خاين علشان قال رائيه ده انا حتى اللى غيروا رائيهم وكانوا مع وقلبوا ضد ماجرؤتش انى اتهمه بالعماله وكلت اللى قلته انى مش هعرف اثق فيهم تانى


لو خونا بعض مش هنعرف نبنيها تانى وهنفضل ندور فى دواير مفرغه  لسنين جاية


الخاين هو اللى ولع فى البلد ونهبها  ودول القانون والقضاء كفيل انه يظهرهم ويحاسبهم ده مش دورنا احنا دورنا نتغير علشان نواكب اللى جاى ونعرف مين الخاين ونتعظ بس ونبنى بقى كفايه خساير


وفى النهاية ارجو اننا نتبع دعوة عمرو خالد ونعمل شير بس فى الخير ارجوكم ماتخدناش الحماسة ونزايد على بعض فى وطنيتنا
                                                                                ويجعله عامر

رسالة الى.........................

طبعا مش عاوزة اقولكم وحشتونى ازاى وبعتذر عن الغيبة بس هى كانت غيبة للمتابعة وبينى وبينكم ماكنتش طالبه شدة اعصاب من النت كمان يعنى كفاية الاعلام والاحداث المتلاحقة وجدال مع الناس واختلاف اراء موال يعنى

مش هحكى معاكم فى اللى حصل اعتقد ان الكل حاكى فيه بما فيه الكفاية
بس انا حابة اوجه رسايل ممكن ماتوصلش لاصحابها  هبعتهالهم بردة 

                                            
                                              رسالة الى
الرئيس مبارك:
                         والله ههو فى كلام كتير حبة اقوله لحضرتك واسئلة كتير جدا كمان 
                 بس مش وقتها لما تهدى واهدى ونهدى كلنا بس دلوقتى حبة اقولك
                 ان اكيد فى اخطاء بس بردة فى حاجات جميلة وماحدش هيقدر يلغى
                  لا ده ولا ده وزى ماقولت التاريخ هيكتب اللى لينا واللى علينا
                 انت ياسيدى ستظل الرئيس الرابع لمصر مهما حاول البعض ان يمحى
                 وسيظل لك تاريخ مضئ شابه الاخطاء
التليفزيون المصرى: 
                ياراجل كنت فين وحشتنا يعنى الف حمدلله على سلامتك وياريت 
                 ماتربطش نفسك بنظام تانى صالح ام طالح وماتستغبناش
قناة دريم:

                   بحي كل اللى فيها سواء اختلفت معاهم او اتفقت كنتم صادقين 
                   ومحترمين وماتقلبتوش مع تقلب الاحداث
الحياة والمحور:
                حاجة تكسف الصراحةيعنى انتم ينطبق عليكم المثل معاهم معاهم
                      عليهم عليهم
مصطفى بكرى:
                       انت اكيد بتهرج صح؟يعنى انت مع مين بالظبط ليك كلام يوم 25
                       يناير وكلام يوم 28وياسبحان الله كلام تانى يوم 8 فبراير ويتغير 
                        يوم 10 فبراير ويتقلب راس على عقب يوم 11 فبراير
                        ماسك ورق على كل الناس طب كان فين الورق ده زمان
د:فتحى سرور:
                        رجل قانون عالمى يا دكتور ماحدش يقدر ينكر بس فلتت منك
                        اهو عز بيقولك التزوير مش عن طريق الحزب ده من الدولة
                        ههههههههههه
رشيد رشيد:
                      يارب التهم بتاعتك تطلع فشنك مش علشانك اد ماهى علشانى
                     اصل كلهم ممكن يتشك فيهم ياخى كان باين عليهم انت لا 
                      يعنى لو طلعت صح طب دى تتحسب ازاى بعد كده مش عارفة
النائب العام:
                       الله يكون فى عونك الصراحة
وائل غنيم:
                     احترامى ليك ولكل اللى ساهموا معاك اكيد بس يعنى حكاية اننا نشيل 
                     مبارك والسيدة سوزان من على المنشات دى طلعت اوت منك
                     ليه بقى اقولك انا علشان اولا ده مش وقته يعنى فى حاجات اهم
                     ثانيا علشان   ده مش هيمحى تاريخ يا ابنى وهيخليى الموضوع
                     من ثورة ضد نظام زى مابتقول لحاجات شخصية مع فرد
رابطة شباب 25 يناير
                       ظلمتكم لما اعتقدت انكم من ناديتم لمظاهرة مليونية الجمعه الجاية
                       وقولت بالنص اى العيال الخنكة دول"انا اسفة"
                        لما سمعتكم النهاردة فى المصرية وانتم بتقولوا مالناش دعوة بيها
                        قلت تمام بس ياريت توضحوا ده لان بجد طلعوها ده تهريج
الى من كنت معارضة لهم من اصحابى:
                          
                         الخلاف فى الرائ لا يفسد للود قضية احترم رائيكم واحترم
                        احترامكم لرائ كلنا فى الاخر بنحب بلدنا جدا وبندعى انها تبقى 
                          احسن بدعوا كل واحد زعل من واحد فينا بسبب انه احتد عليه 
                          وقت الازمة انه يعذر ويسامح واللى غلط يعتذر اهو اقله اتعالمنا
                          نحاور ونختلف
الى جميع اصحابى:
                             قلت ومازلت اكرر ان التغيير مش بس تغيير انظمة لا لازم احنا
                             نتغير من جوانا واعتقد ماعدش لينا حجة وماعدناش مقهورين
                              فى جروب او اتنين على الفيس بوك
                             مصر اولا و  المصرى الجديد
                              ياريت نشوفهم ونعرف بلدنا محتاجة منا ايه فى الفترة اللى 
                               جاية على ما المسؤلين يقوموا باللى عليهم
القوات المسلحة: 
                             الف تحية وشكر ليكم وفعلا انا فخورة انكم جيشى
                             لكم منى كل التقدير والاحترام