عنها..46

ياترى لو حصل خلاف بينك وبين جوزك ايا كان مين فيكم اللى غلطان.. والخلاف ده وصل لانه يضربك .. ياترى هيبقى رد فعلك ايه؟..هتسامحيه؟

الاولى

***

عادى كل حد بيبقى ليه رد فعل لما بينضغط.. هكمل عادى ومجرد انه كلمنى عادى هعتبر ده صلح منه

اصل الحياة لازم تمشى

التانية

***

ضرب؟ لا طبعا عمرى ماهكمل.. هيبقى سقط من نظرى للابد وحتى لو بحبه مش هكمل ومش هسامحه.. اصل ده مبدأ وطالما عملها مرة فممكن تتكرر وكده قدامك حل من اتنين ياتعيشى مع اللى بتحبيه ويهينك او تعيشى بكرامتك

التالثة

***

طالما بحبه فكل شئ ممكن يتغفر.. يصالحنى بس وخلاص هنسى كل حاجة

الرابعة

***

هاخد جنب لحد مايعرف غلطه.. واجبات بيتى كلها هعملها وهرد على اى سؤال او طلب يطلبه منى ده حقه وبس لحد مايعرف غلطه

___________

ملحوظة:كدى عينة لاربع بنات متعلمين تعليم عالى وبيشتغلوا ومستقليين ماديا ومش مرتبطين..

الاربعة تتراوح اعمارهم ما بين 23 ل 35

 

# مما_قرأت

وهكذا تطور الكحك, كان يصنع من السمن البلدى الأخضر الفاخر, فصار يصنع من الزيوت النباتية التى تُعبأ فى العلب الصفيح,

كان يرش عليه سكر خشن,

وكانت الكحكة زمان تتعرض لامتحانات قبل ان تخرج من المصنع مثل أى سيارة المانية فى عصرنا,,

كان الكحكى يجئ _والكحكى هو الذى يذوق الكحك_

ويمسك الكحكة فى يده ويقربها من فمه, فإذا لم تذب ذوبانا قبل ان تصل الى فمه كانت رديئة..

اما اليوم فالكحكة جامدة كقطعة الحجر,ويمكن اعتبارها سلاحا كما حدث فى مشاجرة بين عائلتين على الكحك,

اذ انبدل صاج مكان صاج, فقالت المدعية الاولى صاحبة الصاج الناعم ليس هذا كحكى هذا كحك يبطح لو ضربتك به,

ثم امسكت كحكة بيدها وضربت بها وجه المجنى عليها فسال دمها وكادت عينها تروح, وعملت لها ثلاث غرز فى جبهتها واستغرق شفاء الجرح اكثر من 21 يوما

, واحتار وكيل النيابة فى تحديد نوع السلاح المستخدم فى الضرب .. فسأل المتهمة :

- ضربتيها بكحكة يا ولية؟

قالت:  غاظتنى يا بيه.. قالت ده كحكى.. وكحكى يدوب فى الفم , بطحتها لتعرف ان الصاج اتبدل!!

 .................

ان للكحك دنياه, هو علم كبير تخصص فيه المصريون وتوارثوا تخصصاته, ويحتفظون بأسراره التى تجهلها تماما أكادمية الكحك فى موسكو , ومركز أبحاث الكحك فى امريكا :)

من كتاب مذكرات صائم

# حادى بادى

مشكلتك يا عزيزتى انك مترددة.. مترددة جدا فى الواقع

 وهذه لعمرى أفة كبرى..

انتى تقفين عند القرار وتترددى ثم يفوت أوانه فتندمين على عدم اتخاذك اياه..

وتخرجين من تردد وندم لتدخلين فى تردد اخر من مواجهة اخرى وبالتالى ندم اخر..

وهكذا..

ويضيع العمر

 

# استاذى العزيز

ونيس النهاردة وهو قاعد على القهوة كان قاعد على التربيزة اللى جنبه راجل عجوز جدا كل مايمسك كوباية الشاى تقع من ايده.. جرسون القهوة  زعقله واتريق عليه .. ونيس شخط فى الجرسون ازاى مايحترمش حد فى السن ده

الراجل شكر ونيس باللغة العربية الفصحى وسأل ايضا ان كان هو ونيس ابو الفضل جادالله .. تعجب ونيس ازاى الراجل عرفه ولما دقق فيه اكتشف انه مدرس اللغه العربية اللى كان بيدرسله فى ابتدائى

قام ورحب بيه جدا ووطى باس ايده وعزمه فى بيته يعرفه على اولاده
وهناك عرفنا منه ان هو صاحب مقولة ابنائى اعزائى فلذات اكبادى اللى ونيس ماسكهالنا  من اول ما بدأ..
المشهد ده خلانى وقفت الحلقة وقعدت احاول افتكر مدرسين الابتدائى ومين فيهم اثر فيا كده بحيث تفضل كلمة علمهالى معلقة معايا طول العمر ده  ..

 مافتكرتش منهم الا ابلة سهير مدرسة الاقتصاد المنزلى اللى علمتنى ازاى اعمل مفرش كورشيه

وسألت نفسى ازاى مش فاكرة غيرها وهى مادة فرعية مافيهاش امتحانات .. يمكن علشان دى اللى كانت بتعلم من قلبها ومش منتظرة تدى دروس خصوصية .. وجايز لان دى الوحيدة اللى طلعتنى بحاجة مفيدة فى المدرسة؟
فين المدرس اللى قال كلمة واحنا فى ابتدائى واثرت فيه لدرجة انه اخدها منهاج لحياتى يربى عليها اولاده


أسئلة كتيرة دارت فى دماغى .. فين المدرس اللى دلوقتى بيفتكر تلاميذه .. اعتقد علشان المدرس من دول يفتكر تلميذ لازم يكون بيتعامل معاه على انه انسان هو بيشكل وجدانه مش مجرد سبوبة
فين الطالب اللى دلوقتى بيفتكر استاذه وبيتكلم عنه بالتقديس ده لدرجة انه يبوس ايده اعترافا بفضله..  حاليا كل مدرس بقى له اسم حركى وفى الغالب بيكون تريقة على ضعف شخصيته او على طباعه المادية او لزماته

فين مدرس اللغه العربية اللى بيتكلم لغة عربية فصحى فى تعاملاته لانه بيحب مهنته دى ويقدساها

اعتقد ان المشهد ده  لو شافه جيل قبلى هيبقى عنده بعض ذكريات منه.. جيلى مثلا هيبقى عنده مشهد مشابه لده بس مشوش وباهت جدا ولو افتكر منه جزء يبقى حلو

اما الاجيال الحالية فاعتقد ان المشهد هيبقى بالنسبة ليه هزلى او مبالغ فيه ..

رسالة 30 (رسايل الى مجهول)

التسعة وعشرين

(30)

نفسى تكون واد شيك كده مهما كان سنك حاسس انك شاب.. 

ده هيخليك تتنطط وتتجنن معايا وقت ماتبقى طالبة ده

#النفخ فى الزبادى

مشكلتك يا عزيزتى هى خوفك من الجرح..من كثرة المرات التى عاد لكى فيها قلبك وهو يتألم

ولكى تحميه اصبحت علاقاتك مع الجميع سطحية.. سطحية بشكل مبالغ فيه

اصبحتى لاتشعرين بدفئ المشاعر ..

 فمن كثرة حرصك بنيتى حصون

 وبقيتى حتى  بتنفخى  فى الزبادى

 

رسالة 29 (رسايل الى مجهول)

التمنية وعشرين

(29)

مش عارفة هخليك تقرا المدونة ولا لاء..

هعرفك بوجودها اصلا؟

المدونة دى عبارة عن حالة ..

 بس ممكن انت تفهم اللى فيها غلط

مش عارفة ..

 هتخلينى اسيب لنفسى مساحة بعيد عنك اخد فيها نفسى ولا هتكون انت نفسى اللى برتاح معاها وماخبيش عليها اى حاجة وتفهمنى من غير ماحتاج اشرح وابرر

 تفهمنى من مجرد كلمة

مش عارفة!