على الهامش.... 1

انا نفسى احلم حلم حلو اوى وافضل فكراه.. ويتكرر معايا الحلم كذا يوم ورا بعض 

عنها .. 7

قالتله .. انا مخنوقة اوى 

قالها .. من ايه بس !

قالتله من المجتمع.. خانقنى ومكتفنى .. مش عارفة اعمل اى حاجة.. لا عارفة اسافر فى مكان احبه وقت ما احب.. ولا عارفة اتحرك ولا حتى افكر بصوت عالى فى اى حاجة تخطر فى دماغى.. ديما فيه اصول وقواعد ونظرة ناس بتحجمنى ولازم اعمل حسابها.. نظرة بتوقفنى مكانى!!

قالها : ممكن.. انتى بنت وطبيعى فى مجتمعنا فيه قيود على البنت..  بس القيود دى مش مصدرها الناس بس.. لو عاوزة الحقيقة انتى كمان مصدر  للقيود دى.. انتى كمان هماكى نظرة الناس وبتعمللها حساب وعاوزة تكونى فى نظرهم مثال التربية الاخلاق وبمقاييسهم.. 

انت كمان من الناس..

على اد ماهم مكتفينك وبيشدوا الحبل انتى بتشدى الطرف التانى. !

 

مع نفسى 22

عن فستانى وانا صغيرة واللى لسه امى محتفظة بيه لحد النهاردة وكل ماتشوفه وتبصلى وانا كبيرة كده وتبتسم

عن البوم صورى وانا صغيرة ..اللى فيه صورتين حبانى فيهم اوى صورة وانا بعيط علشان خايفة من الراجل اللى بيصورنى واللى بيعمل قرد علشان يضحكنى والصورة تطلع حلوة.. وصورة وانا مع بابا فى سبوع اختى..( كنت طفلة حلوة على فكرة)

عن البوم صور الجامعة واللى فيه اجمل شلة اصحاب ماعرفش عن كتير منهم دلوقتى حاجة 

عن الشاليموه اللى مربوطة فى بعضها واللى محتفظة بيها من ايام الجامعة وماحدش عارف انها بتاعة مى صاحبتى اللى كانت عندها هواية عمل اشكال من الشليموهات لحد ماسميناها مى شاليمو

عن اخر يوم امتحانات فى الكلية والبلطو اللى خليت كل اصحابى يمضولى عليه ويكتبولى عليه كلام للذكرى  :) 

عن حفلة التخرج والكعب اللى كانت هيتكسر وانا بستلم شهادة التخرج

عن الميدالية اللى فقدت بريقها ولسه محتفظة بيها  وكانت اول هدية عيد ميلاد من اصحابى

عن دوشة .. الدبدوب الجميل الكبير اللى استنيت حد يهدينى بيه ولما ماحدش عملها اشتريته من اول  مرتب ليا وبقى صديقى الصدوق  وكاتم اسرارى

عن اول يوم شغل ليا فى صيدلية او اول يوم شغل ليا فى المستشفى الحكومى

عن اول عريس اتقدملى ولبختى يومها ..

عن ناس كنت فاكرة انى نسيتهم للابد وتيجى حاجة تفكرنى بيهم 

عن ناس كتير كل ما افتكرهم ابتسم واقول ايييييييييه كانت ايام

عن ناس كل مافتكرهم ادمع واسكت

عن حاجات كنت فاكرة انى هعملها وماعملتش منها اى حاجة

عن كتاب اقرر انى اقراه مرة تانية والاقينى كاتبة على الهامش بتاعة اى حاجة وتعجبنى واحاول افتكر انا كتبتها ليه..

عن اجندة الاهداءات اللى لقتها فجأة وانا برتب الكومدينو بتاعى ولقيت فيها كلمات من اصحاب وزمايل ومدرسين ليا من ايام ثانوى

عن رسالة على موبايلى حلوة  ومر عليها سنين ومش عاوزة امسحها

عن ارقام على موبايلى الاقيها وانا بدور وافتكر اصحابها اللى ماتكلمناش من سنين

عن قصص حب لاصحابى كنت طرف فيها ومعظمها باظ..

عن سنين كتير بتعدى وسيبالى ذكريات 

عن الذكريات 

 

مع نفسى ... 21

بقالى فترة كبيرة مش مبسوطة مش عارفة علشان الروتين ولا علشان حال البلد ولا علشان الاحلام الكتير اللى متكربسة ولا بيتحقق منها حاجة ولا علشان كل ده مع بعض..

المهم انى مش مبسوطة

وبصراحة انا زهقت من الحالة دى وعاوزة اخرج منها فقررت انى اعمل حاجة تفرحنى جايز افلح..

فكرت ..فكرت.. اعمل ايه

اوك ارتب افكارى الاول واكتب الحاجات اللى بتفرحنى  واهو تبقى مرجع لما اتزنق "وانا زنقاتى كتير" ممكن ارجعله وافكر نفسى

 1/ببقى مبسوطة لما اكل شيكولاتة.. دى اول حاجة جت فى دماغى الصراحة :)

2/ لما بقعد فى موكا  واشرب بوريو من عنده وحط كذا خط تحت من عنده دى  او اخد البتاع اللى مش عارفة اسمه ده واللى بيبقى فيه ايس كريم وطالع منع اربع انواع من الشيكولاته :) وعلى فكرة لما اجى اطلبه بقوله كده ههههه

3/ اقرأ حاجة لاحمد خالد توفيق الحقيقة الراجل كلامه بيظبطنى ويسلام بقى لو حاجة فيها رفعت اسماعيل :) ولو مخنوقة اوى يا حبذا لو حاجة انا قريتها قبل كده وضامنة مفعولها زى مثلا اسطورة البيت i love it :)

4/ اكتب تدوينة من تدوينات مع نفسى  ماعرفش بحس انى بفضفض فيها 

5/ انزل اشترى لبس .. وبما انى بتخنق كتير فبشترى لبس كتير .. الحكاية دى مبوظالى مزانيتى على الاخر بس مش مشكلة  المهم انى ببقى مبسوطة

6/ اشترى رواية جديدة وتكون حلوة 

7/ اشوف فيلم اجنبى حلو والحكاية مابتخرجش عن فيلمين يا اما Definitely may be or The Holiday او حاجة لحلمى 

8/ افتكر اى ذكريات حلوة بس الحل ده مش بعتمد عليه كتير لان فى الغالب بتقفل الذكرى دى بحاجة مش حلوة او حتى بتسلمنى لذكرى مش حلوة فيعتبر ده حل مش مضمون عواقبه اوى فبلاها احسن

9/ لو كل ده  بقى مافلحش او كان حل مؤقت فكده بعرف ان مافيش حل ..غير النوووووووووووووووووم

 

فينك يابكرة ؟!

NOW>>>> وتمشى مع نفسى 20 !

المفروض اصحى دلوقتى علشان اليوم خلاص بدأ ولو اتأخرت اكتر من كده هيخلص..

المفروض اتغدى دلوقتى علشان الحق انزل شغلى..

المفروض البس وانزل حالا معاد شغلى جه واللى ماسكة شفت الصبح لازم تمشى حالا بردو..

 المفروض افتح التليفزيون واتفرج على المسلسل اللى انا دبست نفسى وبتفرج عليه بقالى عشرومية يوم..

المفروض اقفل الدرج وامشى دلوقتى علشان معاد مرواحى من شغلى خلاص جه..

المفروض اقعد معاهم فى البيت حبة والعب شوية على النت او اشوفلى اى فيلم على اللاب والحق انام علشان الحق اصحى..

احساس فظيع بان فيه منبه فى دماغى واقفلى على راس الساعة وبيقولى على مفروضات كتير فرضتها على نفسى او اتفرضت عليا..مش هتفرق..

نفسى المنبه ده حجارته تخلص بقى..

***********************

امنيات كتير مفروض تتحقق دلوقتى..ده وقتها.. كل المعطيات بتقول ان ده وقتها

الجرس فى دماغى عمال يرن بيقولى كده بيقولى ان الساعة اللى ظبطه عليها من كام سنة خلاص بترن ولو اتأخرتى عن كده الامنيات دى هتقدم ومش هيبقى ليها معنى ولا طعم.. انجزى بقى ..اتحركى بقى..

ولا عارفة اتحرك ازاى ولا فى اى اتجاه..والمنبه عمال يرن لما صدعنى

خلاص تعبت يارب حجارة المنبه ده تخلص بقى...

صرخة = حياة