S.M.S 2

ماتحاولش تملا الفراغ اللى جواك بحاجة مش مناسبة..لو اصغر هتفضل محسساك انك جواك فاضى ولو اكبر هتخنقك..

استنى الحاجة المناسبة ليك انت اللى تكملك انت..ايا كانت هى ايه..

عن ..الشتا

عن كوباية النيسكافيه السخنة..

عن الشرابات والجوانتيات ام الوان زاهية..

عن لبس الشتا اللى بيحسسك بالهيبة..

عن تخزين الهدوم الصيفى وتنزيل الشتوى ..

عن لمة العيلة على سرير واحد والفرجة على التليفزيون..

عن تمن الفول وتمن اللب اللى بتشتريه وانت مروح علشان السهرة تحلى..

عن شربة العدس بنكهتها الشتوية جدا..

عن ازاز الشباك اللى بيتكثف عليه البخار وبتلاقى نفسك بترسم عليه اول حرف من اللى بالى بالك..

عن ليلة راس السنة ..

عن الوقوف ورا الشباك والفرجة على المطر والدعوة المستجابة وقتها..

عن احساس الدفا بعد التكتكة..

عن الالوان اللى كل ما بتغمق كل ما بتدفيك..

عن الوضوء بمية ساقعة علشان تكسب ثواب..

عن التمشية على الكورنيش تحت المطرة الخفيفة وريحة المطر اللى بتملى بيها صدرك فى شهيق  بتحاول تحتفظ بيه جواك على اد ما تقدر..

عن الايس كريم اللى بيحلالك تشتريه فى عز البرد..

عن الكوفية اياها..

عن مكانى اللى باظ

بحب انا جدا اتامل البحر او النيل وده على حسب مودى.. اوقات ببقى فى مود احب اشوف فيه البحر بموجه العالى وهو فى عز ثورته..وفى مود تانى بحب اشوفه وهو هادى كده وصافى ومش مزعبب

وعندى مود بحب فيه  اشوف النيل وهدوؤه وسكونه وتقله ورتابته وملله لو جازلى التعبير...انا حاليا بقى فى مود النيل...

شفت مشهد فى التليفزيون بينقل البطل  وهو واقف فى مكان على النيل فى القاهرة وقاعد على سور منخفض  كده وشه للنيل الهادى وضهره للناس والزحمهة ..ضهره للدنيا كلها..

 اتمنيت وقتها الاقى مكان زيه بس اجيب القاهرة منين انا دلوقتى؟!!

طب انا احير نفسى ليه مانا عندى نيل فى المنصورة بردو..نزلت اتمشى على المشاية وادور على المكان اياه..لقيت زيه بس للاسف...مكان مشوه

سور عالى ماينفعش يتقعد عليه..ولو قضتها واقفه هلاقى تحت نظرى زباله ..زبالة ..زباله..على طول المشاية زبالة.. مشيت على امل انى الاقى مكان خالى منها..على الفاضى !

ذنب الناس اللى رمت الزبالة ولا ذنب الحكومة اللى مابتشلش الزبالة واللى مابتمنعش رميها..البيضة الاول ولا الفرخة...مش فارقة معايا وقتها المهم ان المنظر باظ ولو غضيت النظر والشم فاستحالة هغض السمع عن اللى يمشى ويلاقى بنت واقفة لوحدها مش ماشية مع محرم او مع شلة بنات خارجين مع بعض يحموا بعض اكتر منهم يتسلوا

باظت القاعدة وباظت الواقفة واخدتها من قاصرها وحطيت نفسى فى تاكسى  مشغل نشرة الاخبار !!

وروحت ....

S.M.S 1

فى حاجات ماينفعش تحاول فيها..

ماينفعش تحاول تحب او تحاول تكره..ماينفعش تحاول تفرح او حتى تزعل

دى حاجات بتطلع من جواك لوحدها ماينفعش تحاول تعملها

مع نفسى 15

الناس نوعين..نوع ماشى فى الدنيا بيعافر فيها..تلطشله وبيعاند فيها لدرجة انه مش شايف تفاصيلها,شغلاه تفاصيله هو اكتر..

ونوع تانى زى حلاتى راكب قطر او عربية على حسب ريتم حياته وبيتفرج على الدنيا من شباكها بيتابع تفاصيلها ومبهور بيها ونفسه ينزل يعيش زى اللى عايشيين بس خايف..خايف يبقى جوة الصورة

******************

احساس غريب لما تكون فرحان علشان المفروض تبقى فرحان,متفائل علشان الكل بيقولك المفروض تبقى متفائل..بتحلم علشان فيه حلم ادامك والمفروض تكمله تيجى تدخله تحس ان هو حلمك العنوان بيقول كده بس التفاصيل مش تفاصيلك مش عارف تتعرف عليها..فيه شبه اه بس مش تفاصيلك

*****************

 

مع نفسى 14

احيانا الواحد بياخد على حالة الحيرة اللى عاش فيها وقت طويل لدرجة انه لما يصادف حالة استقرار..بيحتاس بيها!!..بيخاف منها..وبياخد وقت على مايتعود عليها..

المهم تصبر هى عليه بقى!

**************

من اصعب الحاجات انك تبقى مفروض تاخد قرار اقف ولا امشى؟..افضل زى مانا ولا اتحرك؟!..

انا كده كويسة..طيب لو غيرت كده ده هفضل كويسة ؟ ولا هبقى احسن؟ ولا هخسر؟

وكتير كتير من علامات الاستفهام!!

 علشان اعرف اجابتها لازم  اقرر الاول...صعبة اوى بجد

عن ..الربع جنية

من يومين كده كنت بحاسب واحد من الزباين وكان بقيله ربع جنيه,ودار بينا الحوار ده..

انا:ثوانى اجيبلك الربع جنيه الباقى

الراجل: خليه يادكتورة مش مهم

انا: لا ازاى ده حقك 

الراجل :مش مستاهلة ياستى ثم هو بقى لسه فيه حاجة اسمها ربع جنيه ده الجنيه نفسه خلاص الله يرحمه اقولك ولا تزعلى هاتيلى بيه اى حاجة مناديل مثلا..

انا:معلش المناديل بنص !

الراجل(وهو بيضحك): علشان تصدقى لما اقوك مش جايب همه ..اقولك هاتى فوار اهضم بيه اللى بيحصل ..واخده ومشى

طلعت انا بقى الربع جنيه من الدرج وفضلت ابصله..يااااااااااااه اد كده مابقاش ليك قيمة؟!

فين ايام زمان..انا فاكرة كوبس وانا صغيرة قبل مادخل المدرسة على طول.فاكرة لما بابا الله يرحمه كان بيدينى مصروفى اللى كنت ببقى مصممة انه يبقى ربع جنيه..حتى لما كنت باخد نص او جنيه كنت بصمم انه يتفك ارباع..ماكنتش بفرح الا لما امسك الورقة اللى ماعرف ان كان لونها ازرق ولا اخضر!

كنت بشوفها مختلفة عن باقى الفلوس وياسلام لو كانت عيدية..ربع جنيه جديد لانج والوانه زاهية كده وتشد..قمة الفرحة

كان بيجيب وقتها حاجات كتيرة..كان بيجيب كل الحاجات اللى انا بحبها على الاقل..بلونات..شيكولاتات..بومب..كل حاجة وخصووووصا البسبوسة ..

كنت انا واصحابى نروح لمحل الحلويات اللى فى اول الشارع وكل واحد معاه الربع جنيه بتاعه ونديهم للراجل اللى عارف طلبنا اليومى طبعا ..كل واحد قطعة البسبوسة المتينة :)

عدت الايام وفضلت معزتى للربع جنيه زى ماهى..احب ادى لاصحابى فى العيد ربع جنيه جديد مكتوب عليه كلمة حلوة واخد منهم بردو ربع جنيه مكتوب عليه كلمة حلوة..

فضلت معانا العادة دى لحد ما طلعولنا فى يوم بحكاية الربع جنيه المخروم..وبعدين سدوا الخروم وعملوا الربع جنيه المقروض الصغنن ده ..بهدلوه يعنى..وماكتفوش بده ..لا..وصلوا الناس لدرجة الزهد فيه حتى ولو كان حقهم !!

حطيت الربع جنيه فى الدرج تانى ولقتنى بقول ..ايييييييه كانت ايام