مع نفسى 5

عندما كنت اريد شيئا فى صغرى  لم تكن تحضره لى 

فقط كنت تساعدنى لاحصل عليه بنفسى

رحمك الله يا ابى

**************************

فى الفترة الاخيرة ديما حاطة سماعات الموبايل فى ودانى وبسمع حاجة...

اى حاجة......

المهم انى اسد ودانى عن ما يدور حولى...

*******************************

البرد جاى بدرى السنة دى
احساس لا يوصف لما امسك ماج الكابيتشينو السخن بين اديا فى عز البرد


احساس الدفا حلو اوى


*****************************

طول عمرى نفسى العب كورة
بحقد على الولاد على فكرة علشان بيعرفوا يلعبوها 
عندى احساس انهم بيفرغوا فيها طاقة كبيرة جدا عندهم
اشمعنا هم يعنى

معطف من قيد

ده لينك الجزء اللى قبل ده

اضغط هنا 

خرج حسام من العيادة وهو يحتضن زوجته وابنته ولديه يقين بان الغشاوة التى كانت على عينيه قد انزاحت
وعلى وجهه ابتسامة احتارت زوجته فى تفسيرها وعندما هم بالمغادرة قالت له لقد نسيت معطفك!

نظر لها قليلا ثم قال لا حاجة لى به
فقالت له بدهشة كيف؟ ان البرد شديد ثم وان كان لا حاجة لك به فهل ستتركه هنا؟

صمت قليلا وهو يتذكر انه ليس معطفه ولايحق له ان يتركه......فأخذه  وقرر ان يعيده فى الصباح لناصر صديقه

عندما وصل لمنزله وجد ناصر ينتظره فى مدخل العمارة وهو يحمل معطفه الذى بدله بالخطأ

سأل ناصر عن حالة الصغيرة ثم اخذ معطفه وودع صديقه على امل اللقاء القريب وانصرف.....

ركب سيارته واخذ يدور فى شوارع المدينة ......

ماذا يفعل الان ......لقد مر الوقت مع اصدقاءه سريعا


يالها من لحظات سعادة نادرة سرقها من الحياة.......فقليلة هى اللحظات التى يضحك فيها من قلبه هكذا 


قليلة هى الاوقات التى يكون فيها على طبيعته


يضحك ......يغضب.......يبكى .......يمزح........


كم اشتاق لناصر........كم اشتاق لنفسه التى لم يعد يعرفها.....


هل هذا ناصر الذى كان محط اعجاب الجميع ايام الجامعة!!!!!!!

هل هذا ناصر المفعم بالامال والاحلام!!

تذكر كيف كان شاب مرح ,متفائل,طموح.......


ولنضع العديد من الخطوط الحمراء تحت طموح هذه....


فهو يحلم بان يتم دراسته وان يجد عمل مرموق يتيح له ان يصبح من علية القوم وفى وقت سريع


نعم........ولم لا.


فلديه من المقومات مايتيح له هذا فهو شاب فى مقتبل العمر ذكى ووسيم ولبق وهى مقومات من الممكن ان تحقق الكثير ....لمن يستطيع ان يستغلها......هو فقط يحتاج لفرصة


ولقد اتت هذه الفرصة فى صورة(هدى)


تلك الفتاة الرائعة الجمال والرقة والاهم من ذلك التى تمتلك من الثروة والنفوذ مايتيح له تحقيق كل احلامه ....مع بعض الجهد


وقد كان ....بدء فى محاولات لفت الانتباه وساعدته وسامته ولباقته لابعد الحدود


وماهى هى الا شهور قليلة وكانت هدى متعلقة به جدا..لدرجة انها هى من اقترح عليه ان تعرفه على والدها رجل الاعمال الشهير 


ومرت الاحداث سريعا وتخرج وتقدم لخطبة هدى واستلم عمله فى احدى شركات الاب وتزوجا 


ومع مرورالوقت بدات شخصية زوجته الحبيبة فى الظهور


لم تكن تعامله على انه زوج ......بل على انه قطعة اثرية تمتلكها


غيرة قاتلة.ليست غيرة زوجة محبة ولكنها غيرة تملك فلقد اعتبرته ملك لها ....شئ اشترته باموال ابيها ولا يحق لاى احد  ولا حتى هو نفسه الاعتراض على ذلك


يتذكر جيدا عندما نشبت بينهم مشاجرة من مشاجراتهم العديدة .....استفذته لابعد الحدود لدرجة انه رفع يده عليها ولكنه توقف واحس انه ليس من المفترض ان يضرب زوجته مهما حدث...


خرج من البيت حتى يستطيع ان يتنفس ففوجئ بوالدها يستدعيه للشركة وافهمه بشكل واضح ان ابنته هذه (سته وتاج راسه) وان مستقبله المهنى مرتبط بسعادتها وانه لو اساء لها باى شكل  هيرجعه الشارع تانى


وقتها احس بالخوف .....لا يمكن ان يضحى بكل نجاحه .....واختار ان يكمل مهما كانت المتاعب


ولقد علمت الزوجة بما حدث وشعرت بقوتها وبدأت تزيد من التضيق عليه واعتادت على ان ترفع صوتها عليه ........


ومرت بهم الايام هكذا حتى جاء عيد ميلاده من اسبوع وفىوجئ بها قد احضرت له هذا المعطف هدية
يتذكر جيدا الكلمات التى قالتها وهى تقدم له تلك الهدية(خد ياسيدى علشان بس ماتقعدش تشتكى منى جيبالك هدية عمرك ماحلمت تلبس زيها اهو....انت عارف ده تمنه كام!
يلا بس علشان كل ماتلبسه تفتكرنى وتفتكر النعمة الى انت فيها كل سنة وانت طيب)

اخدت تلك الذكريات تمر بذهنه حتى احس بالتعب وقرر ان يذهب لبيته لينام ويرتاح قليلا قبل ان يذهب لعمله

وما ان وصل البيت حتى فوجئ بها مستيقذة

بصوت جهورى: انت كنت فييييييييييين اكيد كنت بتتسرمح مع واحدة من اياهم....

ثم ازاى اكلمك تقفل السكة فى وشى وتقفل موبايلك كمان

فرد عليها بهدوء انا ماقفلتش السكة فى وشك ولا كلمتك اصلا

قالت:انت كمان هتكدب ده انا متصلة بيك بامارة ماقولتلك يازفت ارجع البيت دلوقتى حالا والا يومك مش هيعدى واديك جيت انت كده مابتجيش الا بالتهزئ

ثم لما انت عاوز تتسرمح مع البنات مش مكسوف على نفسك تلبس البالطو اللى جيبهولك هدية من فلوسى ........صحيح ماعندكش دم

انت مابتنطقش لييييييييه

نظر لها ناصر قليلا ثم قال:عاوزانى ارد.......ادى المعطف بتاعك

                              انتى طالق

وتركها وسط زهولها وخرج وهو يستنشق نسمات الصباح............ 
 

بموت.............

هو ده احساسى فى الكام يوم اللى فاتوا

هدوء قاتل

تكرار للاحداث بشكل ممل.........ممل جدا

اوقات بحس ان نفس الكلام بيتكرر

تعبت من كتر مابقول للى بيكلمنى انت مش قلتلى كده امبارح؟!!!

واقع بعيشه لكن ماليش دور اساسى فيه

واقع اقرب للقدر منه لحياة انا بطلتها

واقع مش عارفة اقبله ولا عارفه اغيره

احساس رهيب بان فيه حاجة جواية بتتخنق كل يوم

بتموت...

بتموت.....

بتمووت.......

مش عارفة انقذها...........

بتفرج عليها من بعيد وصعبانة عليا......

اد ايه (كانت) حاجة حلوة......

مع الاعتذار لصديقى Timoالصورة استلفتها من مدونته اسف على الازعاج

مع نفسى4

*ملاحظين ياترى انى مابتكلمش فى السياسة ولا برد على اغلبية مواضيعكم السياسية سواء بالتأييد او الاعتراض؟

حاليا ده بقى حالى مع انى كنت زمان قبل الثورة من اصحاب الاراء السياسية 

فعلا مابقتش عارفة ده لي جايز علشان زمان كان اللى بايده واضح واللى بعارضه واضح 

دلوقتى مابقتش عارفة احدد انا مع مين وضد مين؟

***********************

قانون الابعاد عن الحياة السياسية قالوا انه هيتطبق على اللى هيتثبت عليه جرائم فساد فقط!

كان نفسى يحصل استثناء ويتطبق على كل اللى كانوا فى الحياة السياسية سواء وطنى او غيره

وكمان كان نفسى يتطبق على جماعة الاخوان كلها

تفتكروا لو ده حصل كان المشهد هيتغير؟

تفتكروا كان هيفضل حد بيتكلم فى السياسة؟

****************************

سمعت انا عن الحزب اللى بينادى بتغيير اسم مصر ده 

ياترى انتم سمعتوا؟

!!!!!!!!!!!!!!!!!!!!!!!!!!!!

********************************

لحد دلوقتى مش عارفة احدد ولا افهم نظام القوايم والفردى

يعنى القايمة ده هيتكلم باسم مين؟والفردى ده بيمثل مين؟

*************************

فى بلدنا المرشحين للمجلس نوعين

اللى كانوا مرشحين نفسهم قبل كده سواء وطنى او غيره والاخوان

فردى وقوايم نفس النوعين!!!!!!!!!

************************

عرفت ان هتتفرض غرامة على اللى مش هيدى صوته من قريب ليا 
فسألته طيب هتدى صوتك لمين؟

قالى انا هبطله علشان مش اللى نازلين كلهم يا اما حافظهم صم يا اما ماعرفهمش خالص

شكلى هعمل زيه

****************************

تفتكروا منى الشاذلى بعد ماطلعت هزقت عمرو الشريف على الهوا ولامته على انه ضرب المذيعه على ايدها وطلعت بعد كده المذيعة كبستها وقالت ده كان تهريج

تفتكروا منى هتعتذر؟

طب تفتكروا حد اهتم بالخبر الفظيع اللى خلى المذيعة المبجلة تتشال وتتحط يومها ؟

****************************

سماح انور كانت من معارضين الثورة واحد ابرز نجوم القوايم السودا

وده لانها ايدت النظام وهجمت الثوار على التليفزيون

بقت بتمشى فى الشارع الناس تشتمها وتتعدى عليها هى وابنائها

فصفت اعمالها فى مصر واستقرت فى الكويت

تفتكروا هو ده الحل؟

هو ده المناخ السياسى اللى هنعيشه الفترة الجاية؟

******************************

انا بتسرق!!!!!!!!

مش عارفة والله اوصف الاحساس

انا اتسرقت!!!!!!!!!

اول ما صديقى مصطفى سيف نبهنى انه لقى حاجه انا كنت كتباها من فترة على وول فى الفيس انا يومها استغربت جدا......

انا؟
يعنى ماتخيلتش فى يوم ان الاقى حد واخد كلامى ومنزله سواء بنص او بتحريف وماكلفش خاطره حتى يكتب المصدر

احساس رخم جدا وخصوصا انك مش عارف تثبت ان ده كلامك ولا عارف تسكت وتكبر والكلام عمال بيتشير لدرجة انه وصل لوول ناس قرايبى وبعتنهولى امبارح يقولولى شوفى لقينا بوست حلو اوى!!!!!!!!!!!!!

حاجة تحرق الدم

البوست اهو          بوستى المسروق!

يومياتى8

اللى مش فاكر احنا واقفين فين او اللى مش متابع يتدخل

هنا

قبل ما احكيلكم احداث اليوم العجيب ده عاوزة اشرحلكم حبة حاجات باختصار كده

 انتم فى غنى عن انى اقولكم ان منظومة العلاج فى مصر مضروبة ضربة سودة ورغم انكم عارفين ده بس بردو حابة اقولها تانى وتالت ........وضع العلاج فى مصر اسوء مما تتخيلوا سواء كان علاج عن طريق المنافذ الحكوميه او عن طريق العيادات والمستشفيات الخاصة..فى الحالتين لو قيمونا بما يرضى الله هناخد اكبر سالب صفر فى التاريخ وده مش تشاؤم خالص اللى عارفنى عارف انى شخصية متفائلة.........

ندى بقى مثال صغنن يعرفكم بسبب مشكلة اليوم بتاعنا..

                                    العلاج على نفقة الدولة
                                 **********************
مصيبة من مصايب الزمن ومعروف  انه كان معمول لهدف ولناس معينة وبقدرة قادر اتغيرت كل الاهداف وكل المنتفعين منه وبقم ناس تانيه خااااااااااالص
المريض كان بيجيب واسطة ويقدم روشتات تثبت ان عنده مرض مزمن قلب بقى او ضغط او سكر او.......الخ
وبعد مايخلص الاوراق يطلعله قرار بمبلغ مالى يسحب بيه علاج ويكشف على نفقة الدولة لمدة سنة او 6 شهور على حسب الحالة ويتقسم المبلغ على الشهور والقرار قابل للتجديد
حلو جدا .......فين بقى المشكلة؟!
اقولكم دى مشاكل
مثلا المريض بيبقى كاشف بره وبيجى عاوز يصرف نفس العلاج اللى ماشى عليه بنفس العلب


يقوم الطبيب يريح دماغه ولا يكشف ولا حاجة ويقوم رصصله نفس العلاج اللى فى الروشتة او نفس اسامى الفوارغ اللى المريض جايبها معاه اصلا فى تذكره العلاج


يقوم المريض يروح  فييييين....ايون ......يجى للصيدلى الغلبان اللى يفضل يفت فى قلبه علشان يشرح للمريض ان فيه حاجات من علاجه موجوده وحاجات لاء ويا اما يتفهم المريض وياخد الموجود يا اما يقعد يدعى على الصيدلى اللى مخبى منه العلاج اللى الطبيبه المعالج امرله بيه .......ودوخينى يا لمونة
وهكذا نشأت علاقة هباب بين الصيدلى والمريض فكل من يعمل بالمستشفى ملائكة على اد مايقدروا من ممرضات لاطباء لمدير مستشفى متفهم جدا واسهل حاجة عنده يأشر على التذكرة "يرجى من السادة الصيادلة صرف العلاج"


مين بقى اللى اخد علاج الناس ومش راضى يطلعه,مين بقى اللى بيضرب بكلام الدكاترة والمدير والروشتات عرض الحائط,مين بقى اللى اخد فلوس القرار فى جيبه وكئن المريض دفعهم مقدما؟...........الصيدلى :)


مشى بينا الحال كده لحد ما وزارة الصحة طلعت قرار الله لايسامحهم عليه لحد النهاردة مش فاهماه


العلاج يا جماعه بيدخل المستشفى عن طريق مناقصة بيتم تقديم اسعار للعلاج فيها اقل من اسعار السوق وبتاخد الوزارة اقل سعر
كنا احنا بقى بندى للمريض علاجه بسعر الكراسة فمثلا حقنة الانسولين ام 31ج فى الكراسه مثلا ب25ج فلو قراره ب50 له حقنتين ده على سبيل المثال  تقوم وزارة الصحة فى يوم تقول لاء يا جماعه حاسبوا المرضى بسعر السوق وبالتالى تم خفض حصة المريض من العلاج.......


المرضى طبعا فيهم اللى تفهم وفيهم اللى مصر اننا حراميه وبنضرب على علاجهم لاسباب لايعلمها الا الله


وده كان سبب المشكلة اللى رغيتلكم كل الرغى ده علشان اوصلها


فى يوم كنا بنصرف وبنتعامل مع الناس من خلال شبابيك الصرف واذ بباب الصيدليه حد بيرزع عليه بطريقه هستيريه
فتحنا الباب لقينا ست واقفه قدمنا وبتزعق جدا انتم اخدتم علاجى حرام عليكم انا كان بيتصرفلى كميه كبيره وانتم خسفتوا بيها الارض ......نشرح ولا الهوى يهديكى يرضيكى ولا فايدة انا هشتكيكم وهوديكم فى داهيه وسيييييييل من الدعوات بقى اللى تقبض قلبك


اميرة زميلتنا قررت انها تسكت الست دى: بس بقى ياست انتى عمالين نفهمك من الصبح لو سمحتى اخرجى برا بدل ما ننده الامن(طبعا مافيش امن ولا نيله ده كان تهويش)

واذ بالست رفعت اديها وضربت اميرة صاحبتنا حتة الم ....


حالة من الزهول والصمت اصبتنا كلنا ....طبعا مافيش امن ولا عمال ...الناس هم اللى اتدخلوا وشالوا الست خرجوها 


ويطبطبوا على اميرة والبت متنحة لابتعيط ولا بتنطق واحنا كذلك.....


لحد ما حد  اتكلم وقلها بصى انتى هتطلعى دلوقتى على القسم تعمليلها محضر وكلنا نشهد ده تهزيق .....انا سعاتها ايدت الفكرة بشدة 


وفعلا اميرة كانت ناوية تعمل ده بس تدخل الناس وعياط الست اللى انهارت بعدها خلى اميرة تتراجع وكمان خوفها من دخول القسم اصل حد قلها انتم بنات ناس مايصحش تدخلوا القسم.........!


الموضوع اتلم بس ساب اثر جامد فى نفوسنا كلنا ....
بقينا اعنف مع الناس,بقينا نتكلم مع الناس وبينا مترين على الاقل..........


اتغير كتير فى ال 6 صيادلة اللى كانوا متعيينين لسه من كام شهر وشايفين انهم هيغيروا منظومة العلاج فى مصر
وكانت دى بداية النهاية.....

كل سنة وانتم طيبين

كل سنة وانتم طيبين يا احلى اصحاب

وعيد سعيد عليكم وعلى الامة الاسلامية ياااااااااارب

ماوصيكوش بقى يا جماعة احنا فى ايام مفترجة

ادعوا كتييييييييييير فيها

ادعوا لبلدنا ربنا يصلح الاحوال فيها ويقوينا على اللى جاى

ادعوا لنفسكم ولكل اللى تحبوهم

وادعولى بقى بالمرة ماتنسوش :)

ملحوظة

*********

عارفة انى مقصرة وماردتش على بوستاتكم بقالى فترة

فاللى ملاحظ الغياب او اللى مش ملاحظه معلش حقكم عليا بس والله ماقدرة ارد مش عارفة ليه

كسل جايز او ملل مش عارفة

حقكوا عليا

وكل سنة وانتم طيبين